ក្រោយបានត្រឹមស្មើជាមួយ Liverpool ០-០ កាលពីយប់មិញនេះ លោក Jose Mourinho អ្នកចាត់ការរបស់ក្លឹប Manchester United បាននិយាយថាលោករំពឹងទៅលើសមត្ថភាពរបស់ Pual Pogba ច្រើនជាងនេះ មិនមែនលេងដូចយប់មិញទេ។

Pogba បានធ្វើឱ្យបាត់បង់ឱកាសល្អៗជាច្រើន ក្នុងការប្រកួតជាមួយក្រុម Liverpool កាលពីយប់មិញនេះ ខណៈដែលទម្រង់លេងរបស់គេ ហាក់មិនដូចលេងនៅ Juventus ឬក្រុមជម្រើសជាតិបារាំងនោះទេ។ ដោយសារតែឃើញដូច្នេះហើយ បានជាធ្វើឱ្យលោក Jose Mourinho មិនសប្បាយចិត្តចំពោះកីឡាករជម្រើសជាតិបារាំងរូបនេះទេ។

អ្នកចាត់ការសញ្ជាតិព័រទុយហ្គាល់ខាងលើបាននិយាយថាលោកមានក្ដីរំពឹងខ្ពស់ណាស់សម្រាប់ Pogba ថាគេនឹងជួយក្លឹបបានច្រើន។ តែជាក់ស្ដែងទៅ អ្វីគ្រប់យ៉ាងមិនដូចក្ដីរំពឹងទេ រូបគេលេងដូចអារម្មណ៍មិននៅនិងខ្លួន ហើយសឹងតែធ្វើឱ្យក្រុមចាញ់ការប្រកួតសំខាន់ជាមួយក្រុមហង្សក្រហមទៀតផង។

“យើងគួរតែឈ្នះ Liverpool ១-០ មិនមែនស្មើ ០-០ ទេ។ កន្លែងដែល Pogba លេងគឺសំខាន់ខ្លាំងណាស់ តែចុងក្រោយគាត់ធ្វើមិនបាន នូវឱកាសល្អៗជាច្រើន។ ខ្ញុំសង្ឃឹមថាគាត់នឹងធ្វើបានល្អ នៅប្រកួតក្រោយដើម្បីឱ្យអ្នកគាំទ្រមានទំនុកចិត្តលើគាត់ឡើងវិញ”។

Manchester United កំពុងឈរនៅចំណាត់ថ្នាក់ទី៧ក្នុងតារាងលីគកំពូលអង់គ្លេស ស្របពេលមាន១៤ពិន្ទុតាមពីក្រោយក្រុមលេខ១ Manchester City មាន១៩ពិន្ទុ។ បិសាចក្រហមនឹងត្រូវប្រកួតជាមួយក្រុម Fenerbahce នៅថ្ងៃព្រហស្បតិ៍ខាងមុខនេះនៅកីឡដ្ឋាន Old Trafford ក្នុងវគ្គជម្រុះក្នុងពូល ពានរង្វាន់ UEFA Europa Leageu ៕