ជំនួបវគ្គជម្រុះពានរង្វាន់ Toyota Mekong Club Championship មុននេះបន្តិច ក្រុមម្ចាស់ផ្ទះឡាវ Lanexang United បានវាយកបកយកឈ្នះក្រុមលេខ៣លីគកំពូលវៀតណាម SHB Danang ដោយលទ្ធផល ២ – ១។

ការប្រកួតនៅវគ្គទី១ ត្រឹមនាទីទី១៥ ខ្សែបម្រើលេខ១៧របស់ក្លឹបតំណាងវៀតណាម បានស៊ុតគ្រាប់បាល់នាំមុខមួយគ្រាប់មុន។ ឈានដល់វគ្គទី២ នាទីទី២៦ កីឡាករ Soukaphone បានស៊ុតឲ្យ Lanexang តាមស្មើបាន ១ – ១ វិញ។ ការប្រកួតកាន់តែក្តៅគគុក ដោយក្រុមទាំង២ព្យាយាមវាយលុយគ្នាយ៉ាងខ្លាំង ដើម្បីរកគ្រាប់បាល់ជ័យជម្នះ។ រហូតនាទីទី៧៥ ខ្សែប្រយុទ្ធឆ្នើម khampeang Sayuvuthy បានស៊ុតគ្រាប់បាល់ជ័យជម្នះឲ្យក្រុមឡាវតែម្តង។

នេះជាជំនួបវគ្គជម្រុះដំបូង ខណ:ប្រកួតបន្ទាប់ SHB Danang នឹងទៅប៉ះ Yadanabron FC របស់មីយ៉ាន់ម៉ា នៅថ្ងៃទី២៣ ខែធ្នូខាងមុខ។ ចំណែក Yadanabron FC វិលមកប៉ះ Lanexang United នាថ្ងៃទី២៧ ខែធ្នូ។

ក្រុមដែលឈ្នះវគ្គជម្រុះ នឹងឡើងមកប៉ះក្រុមបឹងកេតអង្គររបស់កម្ពុជា ក្នុងវគ្គពាក់កណ្តាលផ្តាច់ព្រ័ត្រ នាថ្ងៃទី៣១ ខែធ្នូ។