Gareth Bale បានបង្ហាញឈ្មោះមិត្តរួមក្រុមដែលលេងល្អបំផុតជាមួយខ្លួន គឺកីឡាករ Ryan Giggs មិនមែនជាមិត្តរួមក្រុមបច្ចុប្បន្ន Cristiano Ronaldo នោះទេ។

Bale ជាកីឡាករម្នាក់ដែល Real Madrid ទិញចូលថ្លៃជាងគេក្នុងប្រវត្តិសាស្ត្រ។ ខ្សែប្រយុទ្ធម្នាក់នេះ ក៏បានជួយក្លឹបមួយនេះបានច្រើនដែរ ជាពិសេសគឺការឈ្នះពានរង្វាន់ UEFA Champions League បាន២ដងក្នុង៣ឆ្នាំចុងក្រោយនេះតែម្ដង។ ទាក់ទិននឹងរឿងជួយក្លឹបបានទទួលលទ្ធផលល្អនេះដែរ មានអ្នកកាសែតបានសួរទៅគេថា តើកីឡាករម្នាក់ណាដែលជាមិត្តរួមក្រុមល្អបំផុតក្នុងមួយរយ:មកនេះ?

ឆ្លើយនឹងសំនួរនេះ Bale ថាមិត្តរួមក្រុមដែលល្អបំផុតនោះគឺ Ryan Giggs ។ អតីតកីឡាកររបស់ Manchester United រូបនេះ មិនត្រឹមតែជាមិត្តរួមក្រុមនោះទេ គេជានិមិត្តរូបរបស់ខ្លួនផងដែរ ដែលអាចជាមនុស្សម្នាក់ជំរុញខ្លួនឱ្យចង់លេងបាល់ដូចបច្ចុប្បន្ននេះ។

សូមបញ្ជាក់ Bale និង Giggs បានលេងជាមួយគ្នាបានតែ២ឆ្នាំប៉ុណ្ណោះ ពោលគឺនៅឆ្នាំ២០០៦ និង២០០៧ ហើយអ្នកទាំងពីរនេះបានស៊ុតបញ្ជូលទីដូចគ្នាក្នុងការប្រកួតដែលក្រុមជម្រើសជាតិវែល ឈ្នះសាន់ម៉ារីណូ ៣-០ នៅក្នុងឆ្នាំ២០០៧ ៕