ផ្លូវក្រាលបន្ទះស្រូបពន្លឺព្រះអាទិត្យប្រវែង ១ពាន់គីឡូម៉ែត្រ ឬមានផ្ទៃ ២៨០០ម៉ែត្រការ៉េ រំពឹងនឹងបង្កើតថាមពល ២៨០គីឡូវ៉ាត់ ដែលអាចបំភ្លឺទីក្រុង បានពេញមួយឆ្នាំ។ នេះបើយោងតាមសារព័ត៌មាន Bloomberg ចេញផ្សាយកាលពីពេលថ្មីៗនេះ។

ក្រោយពីបានធ្វើការស្រាវជ្រាវ និងពិសោធន៍អស់រយ:ពេលជាង ៥ឆ្នាំ ក្រុមហ៊ុនបុត្រសម្ព័ន្ធរបស់ Bouygues SA បានបង្កើតបន្ទះសូឡា ដែលអាចទ្រទ្រង់នឹងទម្ងន់ឡានធំកង់ ១៨បាន ហើយបានដាក់ធ្វើតេស្តសាកល្បងនៅ ១០០កន្លែង។

ដើម្បីឆ្លើយតបទៅនឹងទម្ងន់នៃការធ្វើចរាចរណ៍ ក្រុមហ៊ុនបានដាក់ប្លាស្ទិកជាច្រើនស្រទាប់ ជាច្រើនប្រភេទ ដើម្បីបង្កើតបន្ទះដ៏រឹងមាំ ជាប់បានយូរ និងប្រឆាំងភាពរអិល។

នៅពេលបច្ចុប្បន្នបន្ទះសូឡានេះ ក្នុង ១ម៉ែត្រការ៉េ គឺចំណាយអស់ប្រមាណ ២,១២៦ដុល្លារអាមេរិក និង ២,៥០០អឺរ៉ូ ដែលរាប់បញ្ចូលទាំងការត្រួតពិនិត្យ ប្រមូលទិន្នន័យ និងថ្លៃតម្លើង។

ការប្រើប្រាស់បន្ទះសូឡានៅលើផ្លូវថ្នល់ គឺដើម្បីជំនួសឲ្យដីទំនេរ ទុកសម្រាប់ការធ្វើកសិកម្ម ហើយលើសពីនេះទៅទៀត ផ្លូវក្រាលបន្ទះសូឡា ក៏អាចសាកថាមពលឲ្យរថយន្តអគ្គិសនីបានទៀតផង។

គួរបញ្ជាក់ថា គម្រោងនេះកំពុងធ្វើតេស្តនៅក្នុងប្រទេសបារាំង ហើយគ្រោងនឹងបន្តទៅប្រទេសកាណាដា សហរដ្ឋអាមេរិក អាហ្រ្វិក ជប៉ុន និងទូទាំងសភាពអឺរ៉ុប៕