ក្រុមហ៊ុន Huawei នៅថ្ងៃនេះ បានប្រកាសពីរបកគំហើញថ្មី ដ៏សំខាន់មួយទៀត ជាលើកដំបូងលើពិភពលោក នៅក្នុងការស្រាវជ្រាវរបស់ខ្លួន ទៅលើថ្មទូរស័ព្ទ Li-ion ដែលមានបន្ថែមសារធាតុក្រាហ្វីនថ្មីជាជំនួយ ជួយធ្វើឱ្យវាអាចទប់ទល់នឹងសីតុណ្ហភាពខ្ពស់ និងមានអាយុកាលយូរជាងថ្ម Li-ion ធម្មតារហូតដល់ទ្វេដង។

សេចក្តីប្រកាសនេះ ត្រូវបានធ្វើឡើងដោយមន្ទីរពិសោធន៍ Watt Laboratory នៃវិទ្យាស្ថានស្រាវជ្រាវកណ្តាល របស់ក្រុមហ៊ុន ក្នុងសន្និសីទលើកទី ៥៧ មួយ នៅប្រទេសជប៉ុន។ លទ្ធផលនៃការស្រាវជ្រាវនោះ បានបង្ហាញថា បច្ចេកវិទ្យាដែលធន់ទ្រាំនឹងកម្ដៅ ក្រោមជំនួយពីសារធាតុក្រាហ្វីន អនុញ្ញាតឱ្យសារធាតុ Li-ion នៅតែអាចបំពេញមុខងារក្រោមបរិស្ថាន ដែលមានសីតុណ្ហភាព 60 °C ដែលជាកម្រិតមួយ ខ្ពស់ជាងសីតុណ្ហភាពកំណត់ សម្រាប់ថ្មទូរស័ព្ទបច្ចុប្បន្ន 10 °C។ ម្យ៉ាងទៀត ថ្ម Li-ion ប្រភេទថ្មីនេះ នឹងមានអាយុកាលវែងជាងថ្ម Li-Ion ធម្មតាគុណនឹងពីរ ពោលគឺ តាមរយៈការពិសោធ វានៅមានថាមពលសល់ ៧០% បន្ទាប់ពីបានឆ្លងកាត់ការសាកបញ្ចូលថាមពលចំនួន ២,០០០ លើក ក្រោមសីតុណ្ហភាព 60 °C៕
ប្រភពព័ត៌មាន៖ huawei