ព្រះសីហនុៈ ហេតុការណ៍មួយបានកើតឡើងបង្កឲ្យមានការភ្ញាក់ផ្អើលដល់សមត្ថកិច្ចទាំងយប់ ដោយមានជនជាតិចិន២នាក់ ចាក់ប្លន់ជនជាតិចិន នៅកាស៊ីណូលើភ្នំ តែជនសង្ស័យរត់មិនរួច ក៏ត្រូវសមត្ថកិច្ចក្រុងព្រះសីហនុចាប់ខ្លួនបាននៅយប់ថ្ងៃទី៣០ ខែវិច្ឆិកា ឆ្នាំ២០១៦ វេលាម៉ោង១០និង៣០នាទីយប់ ស្ថិតនៅកាស៊ីណូលើភ្នំ ក្រុម២៧ ភូមិ៣ សង្កាត់៣ ក្រុងព្រះសីហនុ។

មន្ត្រីនគរបាលព្រហ្មទណ្ឌនៃស្នងការខេត្តបានឲ្យដឹងថា ករណីប្លន់ដោយប្រើកាំបិតចុងស្រួច រវាងជនជាតិចិន និងជនជាតិចិន ដែលជនបង្កមានគ្នាចំនួន២នាក់ ទី១ឈ្មោះ ដឹង ហូសេង ភេទប្រុស អាយុ២២ឆ្នាំ មុខរបរបុគ្គលិកកាស៊ីណូលើភ្នំ កាន់លិខិតឆ្លងដែនលេខ E84415478 និងទី២ ឈ្មោះ លាំង ម៉ូឆាង ភេទប្រុស អាយុ២២ឆ្នាំ មុខរបរបុគ្គលិកកាស៊ីណូលើភ្នំ កាន់លិខិតឆ្លងដែនលេខ E50008409។ ចំណែកជនរងគ្រោះមានគ្នា២នាក់ ទី១. ឈ្មោះ អ៊ូ យ៉ាងកូចឹង ភេទប្រុស មុខរបរបុគ្គលិកកាស៊ីណូលើភ្នំ ត្រូវជនសង្ស័យចាក១កាំបិតចុងស្រួច ត្រូវចំដើមដៃខាងស្តាំ រងរបួសស្រាល និងទី២.ឈ្មោះ លាវ សៀវលីវ ភេទប្រុស មុខរបរបុគ្គលិកកាស៊ីណូលើភ្នំ ត្រូវជនសង្ស័យចាក់១កាំបិតចុងស្រួច ត្រូវចំកណ្តាលខ្នង រងរបួសស្រាល ។

សមត្ថកិច្ចបន្តថា សម្ភារៈដែលបាត់បង់ មានប្រាក់ចំនួន ៣ ០០០ដុល្លារ និងកុំព្យូទ័រលែបថប១គ្រឿង។ ក្រោយពីទទួលបានពាក្យបណ្តឹង ពីជនរងគ្រោះកម្លាំងជំនាញ សហការជាមួយកម្លាំងមូលដ្ឋាន ធ្វើការស្រាវជ្រាវ នឹងឈានដល់ការឃាត់ខ្លួនជនសង្ស័យទាំង២នាក់ ព្រមទាំងដកហូតបាននូវសម្ភារៈមួយចំនួនរួមមាន លុយ១ ០៩៣ដុល្លារ លុយចិន៤០០យ័ន្ត លុយខ្មែរ ៤ ៩០០រៀល កុំព្យូទ័រលែបថប១គ្រឿង ពណ៌ខ្មៅ កាំបិតចុងស្រួច១ដើម ជាឧបករណ៍ប្រព្រឹត្តបទល្មើស។ មន្ត្រីនគរបាលបានបញ្ជាក់ថា មូលហេតុដោយសារជនជាតិចិនទាំង២នាក់នោះបានចាញ់ល្បែង ទើបបែកគំនិតប្លន់ទៅលើជនជាតិចិនដូចគ្នា។

បច្ចុប្បន្ន ជនសង្ស័យនឹងវត្ថុតាង ត្រូវកម្លាំងជំនាញកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕