ព័ត៌មានបច្ចេកវិទ្យា

កំហុស ៩ យ៉ាង នាំឱ្យលោកអ្នកប្រឈមគ្រោះថ្នាក់ដោយសារថ្មទូរសព្ទ iPhone ឬ Android ដោយមិនដឹងខ្លួន

បច្ចុប្បន្ន ថ្មទូរសព្ទចល័តកំពុងក្លាយជាសមាសធាតុផ្សំដែលគួរយកចិត្តទុកដាក់បំផុតមួយ ទាំងពីសំណាក់អ្នកប្រើប្រាស់ និងក្រុមហ៊ុនអ្នកផលិត គឺបន្ទាប់ពីករណីផ្ទុះឆេះដោយសារវាកើតមានជាបន្តបន្ទាប់ ហើយខ្លះបានបង្កឱ្យមានរបួសស្នាម ឬស្លាប់ក៏មាន។ បញ្ហាទាំងនេះ ជារួម ត្រូវបានក្រុមអ្នកជំនាញរកឃើញថា គឺកើតឡើងដោយសារកត្តាពីរធំៗគឺ ទីមួយ គឺដោយសារទង្វើអ្នកប្រើប្រាស់ និងទីពីរ គឺដោយសារថ្ម និងឧបករណ៍ពាក់ព័ន្ធនឹងវាមានបញ្ហាជាដើម។

ដោយមើលឃើញពីបញ្ហានេះ Post Tech សូមលើកយកនូវទង្វើខុសឆ្គងចំនួន ៩ ចំណុច ដែលអ្នកប្រើប្រាស់ទូរសព្ទភាគច្រើនធ្វើឡើងដោយមិនដឹងខ្លួន ខណ:ដែលវាអាចនាំឱ្យពួកគេប្រឈមនឹងគ្រោះថ្នាក់កើតឡើងដោយសារទូរសព្ទផ្ទុះឆេះ ឬឆ្លងចរន្តជាយថាហេតុណាមួយបាន៖

– ប្រើប្រាស់ទូរសព្ទក្នុងពេលកំពុងសាកថ្ម

ដោយសារតែពេលខ្លះតម្រូវការនៃការប្រើប្រាស់ទូរសព្ទមានខ្ពស់ខ្លាំងពេក លោកអ្នកមួយចំនួនចេះតែឈ្លាតបន្តការប្រើទូរសព្ទរបស់ខ្លួនទាំងវាកំពុងដោតសាកថ្ម បើទោះដឹង ឬមិនដឹងថាទង្វើនោះ ត្រូវបានក្រុមអ្នកជំនាញ រួមទាំងរោងចក្រផលិតនានាផងដែរ ហាមខាត់មិនឱ្យធ្វើ ព្រោះវាអាចបណ្តាលឱ្យថ្មទូរសព្ទឡើងកម្តៅខ្លាំង ឬនាំឱ្យផ្ទុះឆេះបាន ជាពិសេស​ការដោតសាកផង បើក 4G ឬ 3G ដើម្បីលេងហ្គេម ឬ Facebook ផង ជាដើម។

– មិនដឹងថាខ្លួនប្រើឆ្នាំងសាកក្លែងក្លាយ

នៅលើទីផ្សារសព្វថ្ងៃ ឆ្នាំងសាកថ្មទូរសព្ទមានក្លែងក្លាយច្រើនណាស់ ហើយពិបាកនឹងកត់ដឹងទៀតផង។ ពេលខ្លះ លោកអ្នកមួយចំនួនមិនដឹងថាខ្លួនកំពុងប្រើប្រាស់របស់ក្លែងក្លាយនោះទេ គឺដោយសារតែពេលទិញ វាត្រូវបានគេធានាថាជារបស់សុទ្ធ។ ដើម្បីជៀសវាងបញ្ហានេះ លោកអ្នកគួរតែទិញឆ្នាំងណាដែលមានម៉ាកសញ្ញាត្រឹមត្រូវ ឬពីហាងដែលគួរជាទុកចិត្ត ឬបើអាចគួរទិញពីក្រុមហ៊ុនទូរសព្ទផ្ទាល់ទើបជាការប្រសើរ។ ក្នុងនោះ ប្រសិនបើលោកអ្នកប្រើផលិតផលទូរសព្ទរបស់ Apple សូមទិញឆ្នាំងសាកណាមានបិទតែម “Made for iPhone/iPad” ដោយនេះមានន័យថា វាជាឆ្នាំងសាកមានការទទួលស្គាល់ពីក្រុមហ៊ុនផ្ទាល់។

– ប្រើឆ្នាំងសាកតាមរថយន្តផ្តេសផ្តាស់

ការប្រើប្រាស់ឆ្នាំងសាកថ្មទូរសព្ទតាមរថយន្ត នឹងកាន់តែប្រឈមបញ្ហាប្រសិនបើវាជាឆ្នាំងសាកគ្មានគុណភាព ដោយសារតែការផ្លាស់ទីរបស់រថយន្ត អាចនាំឱ្យចរន្តអគ្គិសនីរត់ចូលទៅថ្មទូរសព្ទមិនឋិតថេរ និងមិនគ្រប់បាន។ ម្លោះហើយ លោកអ្នកគួរតែរកទិញឆ្នាំងសាកណាដែលបិទតែមបញ្ជាក់គុណភាពពីក្រុមហ៊ុន Apple ផ្ទាល់ទើបគួរជាទីទុកចិត្ត។

– យកឆ្នាំងសាក Tablet ទៅសាកទូរសព្ទ

លោកអ្នកដែលគិតថា ឆ្នាំងសាកថ្មសម្រាប់ iOS Devices គឺតែមួយ សូមគិតម្តងទៀត ព្រោះឆ្នាំងសាកសម្រាប់ពពួក iPad គឺប្រើកម្លាំងភ្លើង 2.1 អំពែរ ឯពពួក iPhone គឺប្រើត្រឹមតែ 1 អំពែរ ប៉ុណ្ណោះ។ ភាពខុសគ្នានេះ ក្រុមហ៊ុន Apple បានអះអាងថា វានឹងមិនធ្វើឱ្យខូចដល់ទូរសព្ទ iPhone នោះទេ ប៉ុន្តែ ក្រុមហ៊ុនបញ្ជាក់ថា វានឹងធ្វើឱ្យ iPhone កើនកម្តៅលើសពីធម្មតាបាន ហើយវាអាចនឹងធ្វើឱ្យប៉ះពាល់ដល់ផ្នែកណាមួយរបស់ទូរសព្ទ។

– សាកទូរសព្ទចោលយូរពេក

យោងតាមការពិសោធរបស់ក្រុមជំនាញ បានរកឃើញថា ការសាកថ្មទូរសព្ទយូរពេក នឹងកាត់បន្ថយប្រសិទ្ធភាពថាមពលរបស់វា។ ប្រសិនបើថ្មទូរសព្ទរបស់លោកអ្នកនៅ ៨០ ភាគរយ សូមកុំសាកវាអី ហើយបន្តប្រើវាតទៅទៀតចុះ ហើយបើទុកឱ្យវាស្រកអស់រហូតដល់ 0% ក៏បាន គឺវាអាចជួយរក្សាអាយុកាល និងថាមពលថ្មឱ្យនៅឋិតថេរយូរអង្វែងបាន។

– ប្រើថ្មគ្មានគុណភាព ឬក្លែងក្លាយ

ទូរសព្ទដើរដោយប្រព័ន្ធ Android ភាគច្រើនអាចដោះដូរថ្មចុះឡើងបានយ៉ាងងាយស្រួល។ ម្លោះហើយ នៅពេលដែលលោកអ្នកទិញថ្មថ្មី ឬបម្រុងទុកសម្រាប់ទូរសព្ទរបស់ខ្លួន សូមជ្រើសរើសថ្មណាដែលមានគុណភាពល្អ ឬថ្មផលិតចេញពីក្រុមហ៊ុនទូរសព្ទផ្ទាល់ ព្រោះថ្មអាយអាចមិនមានគុណភាព និងប្រើមិនបានយូរ ហើយវាក៏អាចងាយនឹងផ្ទុះឆេះថែមទៀតផង។

– ថ្មរបស់ទូរសព្ទចាស់ពេក

លោកអ្នកដែលប្រើទូរសព្ទយូរឆ្នាំ រហូតដល់ថ្មរបស់វាលែងកាន់ ឬសាកពេញម្តងប្រើបានត្រឹមតែកន្លះថ្ងៃ គួរតែធ្វើការផ្លាស់ប្តូរវាចេញទៅ ព្រោះបើតាមស្តង់ដាថ្មដែលអ្នកជំនាញកំណត់ទុក គឺគួរប្តូរមួយឆ្នាំម្តង ទើបជាការប្រសើរ។

– ថ្មទូរសព្ទខូចខាតទ្រង់ទ្រាយដើម

ប្រសិនបើថ្មទូរសព្ទរបស់លោកអ្នកមានការមានការខូចខាត ឬក៏រីកប៉ោងខុសពីទ្រង់ទ្រាយដើមដោយប្រការណាក៏ដោយ សូមប្រញ៉ាប់ប្តូរវាចេញទៅ ព្រោះវាឱ្យបណ្តាលឱ្យសារធាតុធ្យូងថ្ម ឬលីចូមដែកលេចធ្លាយចេញមកក្រៅ ហើយអាចបង្កឱ្យមានការឆាបឆេះ ឬផ្ទុះបាន នៅពេលដែលវាប៉ះចំប្រភពចរន្តអគ្គិសនី។ មួយវិញទៀត នៅពេលដែលលោកអ្នកទិញថ្មថ្មីក៏ដោយ ក៏ត្រូវពិនិត្យមើលវាឱ្យបានម៉ត់ចត់ដែរ ដើម្បីធ្វើឱ្យប្រាកដថា វាគ្មានស្នាមក្រពិត ដាច់ដោច ឬធ្លុះធ្លាយអ្វីឡើយ។

– ប្រើសម្បកទូរសព្ទបំពាក់ថ្មជំនួយបន្ថែម

ការប្រើប្រាស់សម្បក ឬក៏ស្រោមទូរសព្ទដែលមានភ្ជាប់ថ្មជំនួយបន្ថែម ពិតណាស់ វាមានប្រយោជន៍ជួយឱ្យទូរសព្ទរបស់លោកអ្នកបន្តការប្រើប្រាស់បានយូរ ប៉ុន្តែ វាក៏អាចបំផ្លាញថ្មជាប់ទូរសព្ទផងដែរ ប្រសិនបើសម្បកនោះ គ្រប ឬស្រោបទូរសព្ទមិនបានហឹបណែនល្អ ១០០%។ ម្យ៉ាងទៀត ថ្មដែលភ្ជាប់ជាមួយសម្បកទាំងនោះមួយចំនួន អាចនឹងជាថ្មចាស់ ថ្មកែថ្មី ឬថ្មដែលមិនត្រូវជាមួយទូរសព្ទរបស់លោកអ្នកក៏ថាបាន។ ត្រង់ចំណុចនេះ លោកអ្នកគួរប្រើដុំផ្ទុកថាមពលថ្មជំនួយប្រភេទ Power Bank ទើបជាការប្រសើរ៕

មតិយោបល់