ចំនួនអ្នកដែលចុះឈ្មោះបង្ហាញការចាប់អារម្មណ៍ទៅលើទូរស័ព្ទដៃ Nokia 6 ឥឡូវនេះសើ្មនឹងចំនួនប្រជាជនដែលរស់នៅតំបន់ Helsinki metropolitan ប្រមាណ ១.៤ លាននាក់។ កាលពី១សប្តាហ៍មុន ចំនួនអ្នកចុះឈ្មោះបានឈានដល់ ១ លាននាក់។

គួរចំណាំថាចំនួនអ្នកចុះឈ្មោះទាំងនេះ គឺមិនដូចទៅនឹងការកម្មង់ទិញទុកមុនទេ ដោយសារវាពុំទាន់មានការដោះដូរសាច់ប្រាក់នៅឡើយទេ។ ប្រសិនបើអ្នកចង់ទិញក៏ពិបាកដែល ដោយសារចំនួនដែលដាក់ចេញលក់ក្នុងស្តុក ត្រូវបានលក់ដាច់អស់ស្តុកវិញក្នុងពេលតែប៉ុន្មាននាទីប៉ុណ្ណោះ។

សម្រាប់លោកអ្នកដែលចាប់អារម្មណ៍ចង់ចុះឈ្មោះ អាចចូលទៅកាន់គេហទំព័រ JD.com បាន។ តម្លៃរបស់ Nokia 6 ដែលនឹងចេញមកលើទីផ្សារម្តងទៀតគឺខ្ទង់ ២៥០ ដុល្លារដដែល បើប្រៀបតម្លៃលក់លើកមុន។ យ៉ាងណាមិញ ថ្ងៃដែលប្រកាសចេញលក់ម្តងទៀតនេះ ក្រុមហ៊ុនពុំទាន់បង្ហើបឡើយ។

ទូរស័ព្ទដៃ Nokia 6​ នេះ​ដំណើរការ​ដោយ​ប្រព័ន្ធ​ ​Android​ ​7.0​ ​Nougat​ ​មាន​អេក្រង់​ប្រភេទ ​Gorilla Glass​ ​ទំហំ​ ​៥.៥​ អ៊ីញ​​ ​ខ្នាត​ ​១០៨០x១៩២០​ ​(កម្រិត Full HD) ប្រើ​បន្ទះ​ឈីប​ប្រភេទ​ ​Snapdragon 430 បូករួមអង្គប្រតិបត្តិ Octa-Core និងអង្គគណនាក្រាហិ្វកប្រភេទ Adreno 505 រី​ឯអង្គចងចាំទំហំ​ ​៤​ ​GB​ ​អង្គ​ផ្ទុក​ទិន្នន័យទំហំ​ ​៦៤GB​ ​កាមេរ៉ា​ក្រោយទំហំ​ ​១៦​មេហ្គាភិចសែល។

ចំនួនអ្នកគាំទ្រនេះ គឺរាប់ត្រឹមតែចំពោះទូរស័ព្ទដៃ Nokia 6 ពណ៌ខ្មៅ នៅប្រទេសចិនប៉ុណ្ណោះ រីឯជម្រើសពណ៌ផ្សេងៗ និងចេញមកតាមក្រោយ៕

ប្រភពព័ត៌មាន៖gsmarena.com