យោងតាមគេហទំព័រ Sky News ចក្រភពអង់គ្លេស គ្រោងនឹងដាក់ចេញនូវបម្រាមតាមសហរដ្ឋអាមេរិក ដោយហាមមិនឱ្យអ្នកដំណើរតាមជើងយន្តហោះមកពីប្រទេសនៅតំបន់អាស៊ីបូព៌ាមួយចំនួន ដាក់សម្ភារអេឡិចត្រូនិចដែលមានទំហំធំជាងទូរសព្ទដៃទំនើបក្នុងកាប៊ីនយន្តហោះ។

សម្ភារអេឡិចត្រូនិចទាំងនោះ រួមមាន កុំព្យូទ័រយួរដៃ ថេប្លេត ក្បាលចាក់ DVD ម៉ាស៊ីនហ្គេម និងសៀវភៅអេឡិចត្រូនិចជាដើម។ ក្នុងករណីនេះ ប្រសិនបើអ្នកដំណើរម្នាក់ចង់យកឧបករណ៍ទាំងនោះតាមខ្លួន ពួកគេត្រូវឆ្លងកាត់ការឆែកឆេរពិសេសដ៏តឹងរឹងមួយ។

បម្រាមនេះដែរ នឹងត្រូវអនុវត្តទៅលើគ្រប់ជើងហោះហើរត្រង់ពីប្រទេសតួគី លីបង់ ហ្ស៊កដានី អេហ្ស៊ីប ទុយនីស៊ី និងអារ៉ាប៊ីសាអូឌីត ដែលខុសពីសហរដ្ឋអាមេរិកដែលហាមតែចំពោះជើងហោះហើរគោលដៅប៉ុណ្ណោះ ដោយក្នុងនោះរួមមាន របស់ក្រុមហ៊ុន Royal Jordanian, Egypt Air, Turkish Airlines, Saudi Arabian Airlines, Kuwait Airways, Royal Air Maroc, Qatar Airways, Emirates, និង Etihad Airways មកពីប្រទេស ហ្ស៊កដានី កាតាគុយវ៉ែត ម៉ារ៉ុក សហភាពអារ៉ាប់រួម អារ៉ាប៊ីសាអូឌីត និងតួកគី។

យោងតាមគេហទំព័រដដែល ការដាក់ចេញនូវបម្រាមដ៏ចម្រូងចម្រាស់ និងដែលនាំឱ្យប៉ះពាល់ដល់អ្នកដំណើរនេះ គឺធ្វើឡើងក្រោមហេតុផលដើម្បីឆ្លើយតបទៅនឹងការគំរាមកំហែងផ្នែកសន្តិសុខសុវត្ថិភាពជាទូទៅនៅលើធម្យោបាយដឹកជញ្ជូនផ្លូវអាកាសដែលចេះតែបន្តកើតមាន៕

ប្រភពព័ត៌មាន: cnn