ក្រោយពីចក្រភពអង់គ្លេស និងអាមេរិកត្រៀមដាក់ចេញបម្រាមមិនឱ្យអ្នកដំណើរតាមជើងយន្តហោះមកពីប្រទេសអាស៊ីកណ្តាលមួយចំនួន ដាក់សម្ភារអេឡិចត្រូនិចមានទំហំធំជាងទូរសព្ទដៃទំនើបក្នុងកាប៊ីនយន្តហោះរួចមក ក្រុមហ៊ុនអាកាសចរណ៍ Emirates នៅឌូប៊ៃ និង Turkish បានដាក់ចេញនូវវិធានការសុវត្ថិភាពថ្មីមួយ ដើម្បីទប់ស្កាត់ការបំពាក់គ្រឿងផ្ទុះតាមឧបករណ៍អេឡិចត្រូនិច។ នេះបើយោងតាមប្រភពព័ត៌មានពីគេហទំព័រ BuzzFeed ចុះផ្សាយនៅថ្ងៃសៅរ៍នេះ។

Emirates Airline ដែលជាក្រុមហ៊ុនអាកាសចរណ៍ធំបំផុតមួយរបស់ពិភពលោក នឹងតម្រូវឱ្យអ្នកដំណើររក្សាកុំព្យូទ័រយួរដៃរបស់ពួកគេក្នុងប្រអប់សុវត្ថិភាពមួយនៅក្នុងបន្ទប់ដាច់ដោយឡែកក្នុងយន្តហោះ ហើយនឹងត្រូវប្រគល់វាឱ្យម្ចាស់ដើមវិញក្នុងពេលចុះចតដល់គោលដៅ។ ដោយឡែក បើតាមការឱ្យដឹងពីទីភ្នាក់ងារព័ត៌មានរដ្ឋតួគី ក្រុមហ៊ុនអាកាសចរណ៍ Turkish Airline ក៏នឹងដាក់ចេញវិធានការស្រដៀងគ្នានេះដែរ ដោយរាល់គ្រឿងអេឡិចត្រូនិចធំៗ នឹងត្រូវរំដោយស្នោដាក់ក្នុងប្រអប់សុវត្ថិភាពពិសេស ដើម្បីធានាពីការខូចខាត និងបាត់បង់ទ្រព្យសម្បត្តិទាំងនេះរបស់អ្នកដំណើរ ជាយថាហេតុណាមួយ។

បច្ចុប្បន្ន វិធានការសន្តិសុខនេះ ថ្វីត្បិតតែទើបតែត្រៀមនឹងដាក់ចេញតាមជើងហោះហើរដែលតភ្ជាប់រវាងសហរដ្ឋអាមេរិក ចក្រភពអង់គ្លេស ជាមួយតំបន់អាស៊ីកណ្តាល អាព្រិកខាងលិច និងតួគី ក៏ដោយ តែបើតាមក្រុមអ្នកជំនាញផ្នែកសន្តិសុខអាកាសចរណ៍បាននិយាយថា វានឹងអាចរីករាយដាលនៅជុំវិញពិភពលោក។

លោក Jonh Goglia ទីប្រឹក្សាសុវត្ថិភាពអាកាសចរណ៍មួយរូប និងជាអតីតសមាជិកនៃនាយកដ្ឋានសុវត្ថិភាពមធ្យោបាយដឹកជញ្ជូនផ្លូវអាកាសជាតិរបស់អាមេរិក បានលើកឡើងថា «បម្រាមដាក់កុំព្យូទ័រយួរដៃដាក់តាមយន្តហោះ អាចនឹងត្រូវពង្រីកនៅតាមប្រទេសផ្សេងៗទៀត ខណ:បណ្តាញភេវកម្មហាក់បីដូចជាកំពុងកើនឡើង»។

លោកបន្ថែមថា «ក្រោយអំពើភេវរកម្មថ្ងៃទី ១១ កញ្ញា រាល់គ្រឿងអេឡិចត្រូនិច បានត្រូវគេហាមឃាត់ ហើយបម្រាមនេះអាចនឹងវិលត្រឡប់មកវិញ»។

គួរបញ្ជាក់ថា ការដាក់ចេញនូវបម្រាមនេះជាលើកដំបូងត្រូវបានធ្វើឡើងបន្ទាប់ពីក្រុមស៊ើបការសម្ងាត់អាមេរិកបង្ហើបថា ក្រុមភេវកម្មនៅតែបន្តប្រើប្រាស់យន្តហោះពាណិជ្ជសម្រាប់គោលដៅភេវរកម្មរបស់ពួកវា តាមរយ:ការប្រើប្រាស់ឧបករណ៍បច្ចេកវិទ្យាទំនើបៗកែច្នៃទៅជាឧបករណ៍បំផ្ទុះសម្រាប់ធ្វើការវាយប្រហារ៕

ប្រភពព័ត៌មាន: buzzfeed