ក្រុមហ៊ុនផលិតម៉ាស៊ីនថតម៉ាក Nikon បានប្រកាសចេញផលិតកាមេរ៉ាម៉ូឌែល D5 និង D500 ជំនាន់ពិសេស រចនាឡើងសម្រាប់ត្រៀមអបអរខួបគម្រប ១០០ ឆ្នាំ នៃកំណើតក្រុមហ៊ុនរបស់ខ្លួន នៅថ្ងៃទី ២៥ កក្កដា ខាងមុននេះ។

Nikon D5 និង D500 ជំនាន់ពិសេសទាំងពីរនេះ មិនបានផ្លាស់ប្តូរសមាសធាតុផ្សំផ្នែកខាងក្នុងនោះទេ ប៉ុន្តែ ផ្នែកខាងក្រៅវិញ គឺត្រូវបានរចនាស្រោបដោយលោហ:ពណ៌ប្រផេះ និងឡូហ្គូថ្មីបន្ថែម សម្រាប់បង្ហាញពីភាពច្នៃប្រឌិត និងភាពជឿទុកចិត្ត ជាមួយភាពទាក់ទាញដ៏អស្ចារ្យ។

នៅផ្នែកម្ខាងនៃក្បាលកាមេរ៉ា និងខ្សែស្បែករបស់វា ត្រូវបានរចនារំលេចដោយឡូហ្គូខួប ១០០ ឆ្នាំ។ នៅផ្នែកខាងក្រោមកាមេរ៉ា ត្រូវបានឆ្លាក់ពាក្យថា ‘NIKON-CONTRIBUTING TO MANNED SPACE FLIGHT SINCE 1971’ ខណ:ដែលតួកាមេរ៉ាក៏មានភ្ជាប់ឡូហ្គូដូចគ្នាផងដែរ។

ក្រៅពីនេះ ក្រុមហ៊ុនក៏បានប្តូរពណ៌កាណុងប្រភេទ 14-24 មីល្លីម៉ែត្រ 24-70 មីល្លីម៉ែត្រ និង 70-200 មីល្លីម៉ែត្រ ឱ្យទៅជាពណ៌ប្រផេះ និងមានរំលេចឡូហ្គូដូចគ្នាផងដែរ។

យ៉ាងណាក៏ដោយ សម្រាបតម្លៃ និងកាលបរិច្ឆេទចេញលក់ មិនទាន់ត្រូវបានប្រកាសឱ្យដឹងនោះទេ៕

ប្រភពព័ត៌មាន: techradar