ក្រុមហ៊ុន Lilium Aviation បានប្រកាសដាក់សាកល្បងឡានហោះកៅអីពីរ ដើរដោយថាមពលអគ្គិសនីទាំង​ស្រុងរបស់ខ្លួន ​ជាលើកដំបូងបង្អស់ នៅថ្ងៃមិ្សលមិញ លើលំហរអាកាសនៃប្រទេសអាល្លឺម៉ង់។

ឡានហោះគំរូសម្រាប់ប្រើជាមធ្យោបាយធ្វើដំណើរសម្រាប់ថ្ងៃអនាគតនេះ មានសមត្ថភាពអាចហោះឡើង និងចុះត្រង់ ដូចឧទ្ធម្ភាគចក្រ តាមរយៈស្លាបក្រោយ និងស្លាបមុខ ដែលមានបំពាក់ជាមួយកង្ហាជាជួរៗ និងអាចបត់ចុះឡើងបាន។

អំឡុងពេលសាកល្បង ឡាននេះត្រូវបានបញ្ជាការហោះហើរពីចម្ងាយ ហើយវាត្រូវបានក្រុមហ៊ុនអះអាងថា ស៊ីថាមពលអគ្គិសនីតិចជាងឡានហោះប្រភេទដ្រូនរហូតដល់ ៩០% ដែលនេះ គឺជួយឱ្យវាអាចធ្វើដំណើរបានចម្ងាយ ៣០០ គីឡូម៉ែត្រ និងមានល្បឿនអតិបរមា ៣០០ គីឡូម៉ែត្រ/ម៉ោង។

លោក Patrick Nathen សហស្ថាបនិកក្រុមហ៊ុន Lilium Jet បាននិយាយថា ទោះ​បី​ជាឡានហោះនេះ អាចបើកបរដោយស្វ័យប្រវត្តិក្តី ប៉ុន្តែ នៅពេលប្រើប្រាស់ជាក់ស្តែង វាក៏ត្រូវមានអ្នកបញ្ជាផ្ទាល់ផងដែរ ហើយក្នុងនោះ ត្រូវមានឆ័ត្រ​យោង​ និងប្រព័ន្ធ Flight Envelop Protection ដែលនឹងការពារមិនឱ្យអ្នកបើកបរបញ្ជាវាហួសចេញពីដែនសុវត្ថិភាព។

ក្រុមហ៊ុន​ Lilium Jet ក៏មានគម្រោងផលិតឡានហោះប្រភេទប្រាំកៅអីផងដែរ ដើម្បីអាចបំពេញតម្រូវការនៃការធ្វើដំណើរទៅមកក្នុងទីក្រុង សម្រាប់អតិថិជន​ណាដែលមិនចង់ឈឺក្បាលវិលមុខចំពោះការកកស្ទះចរាចរណ៍៕

https://www.youtube.com/watch?v=szc-0pCKZz0

ប្រភពព័ត៌មានៈ theverge