Post News Media ព័ត៌មានបច្ចេកវិទ្យា ក្រុមហ៊ុន Ace...

ក្រុមហ៊ុន Acer បញ្ចេញជើងខ្លាំងផ្តួល MacBook Pro Touch Bar របស់ Apple

ខណ:ក្រុមហ៊ុនផលិតកុំព្យូទ័រភាគច្រើនកំពុងប្រជែងការរចនាកុំព្យូទ័រយួរដៃ ឲ្យមានរាងកាន់តែស្តើង ជា​មួយក្រុមហ៊ុនយក្ស Apple ក្រុមហ៊ុន Acer ស្រាប់តែបង្ហាញវត្តមានកុំព្យូទ័រសម្រាប់លេងហ្គេមកម្លាំងខ្លាំង​តែមានរាងស្តើងមួយម៉ូឌែលហៅថា Predator Triton 700 ប្រជែងជាមួយនឹង MacBo​ok Pro Touch Bar។

នៅឯសន្និសិទ្ធពិភពលោកប្រចាំឆ្នាំរបស់ក្រុមហ៊ុន កាលពីថ្ងៃ ព្រហស្បតិ៍្តមុននេះ លោក Jason Chen ដែលជានាយកប្រតិបត្តិក្រុមហ៊ុន Acer បានថ្លែងថា Predator Triton 700 គឺជាកុំព្យូទ័រយួរដៃដែលមាន​អេក្រង់ទំហំ ១៥.៦ អ៊ីញ ប្រើប្រាស់នូវអង្គគណនាក្រាហ្វិច Daul Nvidia GTX 1080 បង្កប់ដោយអង្គញាណតាមដានក្រសែភ្នែក រួមទាំងក្តារចុចប្រភេទ Full-Keys ងាយស្រួលក្នុងការវាយបញ្ចូលទិន្នន័យ ឬឯកសារការងារផ្សងៗផងដែរ។

បើមើលទៅលើការរចនាផ្នែកខាងក្រៅ ឃើញថាតូខ្លួនរបស់វាមិនបានស្រោបទៅដោយអាលុយមីញ៉ូមទេ ហើយវាក៏មិនមានរាងស្តើងខ្លាំងដូច MacBook Pro ដែលមានកម្រាស់ ១.៥៤ សង់ទីម៉ែត្រផងដែរ ប៉ុន្តែបើប្រៀបជាមួយកុំព្យូទ័រសម្រាប់លេងហ្គេមវិញ វាគឺពិតជាមានរាងស្តើងមែនទែន។ ចំណែកទម្ងន់របស់វា គឺមានប្រហែលជា ២.៥ គីឡូក្រាមប៉ុណ្ណោះ ដែលនេះ វាហាក់ដូចជារាងធ្ងន់បន្តិច បើសិនជាលោកអ្នកធ្លាប់​ប្រើប្រាស់កុំព្យូទ័រដែលមានរាងស្តើង ប៉ុន្តែ Predator Triton 700 នេះ មិនមែនជាកុំព្យូទ័រកម្លាំងម៉ាស៊ីនខ្សោយនោះឡើយ។

ចំពោះក្តារចុចរបស់វា គឺអាចនិយាយបានថាល្អប្រើ និងងាយស្រួលចុច សម្រាប់អ្នកដែលចូលចិត្តលេងហ្គេមពិតជាស្រលាញ់វាជាមិនខាន លើសពីនេះ គ្រាប់ចុចនីមួយៗមានរំលេចដោយអំពូល LED ពណ៌ខៀវស្រទន់ ងាយស្រួលមើលពេលប្រើក្នុងទីងងឹត។

ភាពខ្លាំងបំផុតនៃ Triton 700 គឺឋិតនៅលើបន្ទះប៉ះបញ្ជា ដែលត្រូវបានរចនានៅពីលើក្តារចុច។ វាត្រូវបានក្រាលដោយស្រទាប់កញ្ចក់ Gorilla សម្រាប់ផ្តល់ជូនអ្នកលេងហ្គេមនូវភាពងាយស្រួលក្នុងការប្រើប្រាស់ និងមិនធ្វើឱ្យប៉ះឆ្លងជាមួយបាតដៃឡើយ។

ចំពោះល្បឿនដំណើរការរបស់ Triton 700 ពិតជាលឿនអស់ស្ទះ ពីព្រោះវាបំពាក់អង្គប្រតិបត្តិរបស់ក្រុមហ៊ុន Intel ប្រភេទ Core ជំនាន់ ៧ ចុងក្រោយបង្អស់ ជាមួយអង្គគណនាក្រាហ្វិច Nvidia GeForce ស៊េរី ១០ រួមទាំងប្រើអង្គផ្ទុកទិន្នន័យប្រភេទ SSD និងអង្គចងចាំទំហំ 32GB ប្រភេទ DDR4។

កុំព្យូទ័រសម្រាប់លេងហ្គេមដែលមានរាងស្តើងនេះ ភ្ជាប់មកជាមួយរន្ធដោត USB ប្រភេទ 3.0 ចំនួន ២ និង USB 2.0 ចំនួន​ ១ រន្ធ HDMI 2.0 ចំនួន ១ ព្រមទាំងរន្ធដោតខ្សែអ៊ិនធើណែតចំនួន ១ និងបន្ទះ Killer DoubleShot Pro ដែលអាចផ្គួបប្រព័ន្ធ​ Wi-Fi និងអ៊ិនធើណែតតាមខ្សែ ដើម្បីបង្កើនល្បឿនអ៊ិនធើណិតឲ្យកាន់តែលឿនទ្វេដង។

Predator Triton 700 នឹងដាក់លក់នៅទ្វីបអាមេរិកខាងជើងនាខែ សីហា ខាងមុខ ជាមួយតម្លៃចាប់ពី ២​, ៩៩៩ ដុល្លារ៕

ប្រភព៖ mashable.com

Loading...