ក្រុមហ៊ុន Facebook បាននិងកំពុងប្រឹងប្រែងយ៉ាងខ្លាំងនៅក្នុងការរិះរកវិធីរក្សាការពារឯកជនភាព​របស់​អ្នកប្រើប្រាស់ ដែលកើនឡើងដល់ជាង ២០០០ លាននាក់។ ទាំងនេះ គឺសរបញ្ជាក់យ៉ាងច្បាស់ថា ឯកជនភាពនៅលើបណ្តាញសង្គមយក្សមួយនេះ គឺពិតជាសំខាន់ណាស់។ ប៉ុន្តែ អ្នកប្រើប្រាស់មួយចំនួនប្រហែលនៅមិនទាន់ដឹង ហើយចេះតែបន្តលាតត្រដាងព័ត៌មានផ្សេងៗរបស់ខ្លួនយ៉ាងរីករាយ ឬដោយមិនមានការរឹតត្បិត។

ខាងក្រោមនេះ គឺជារឿងរ៉ាវ ឬព័ត៌មានឯកជនចំនួន ៨ ចំណុច ដែលលោកអ្នកគួរដកចេញឱ្យបានកាន់តែឆាប់ កាន់តែប្រសើរ ពីទំព័រ Facebook របស់ខ្លួន ដើម្បីជៀសវាងការប្រឈមនឹងហានីភ័យផ្សេងៗចំពោះសុខសុវត្ថិភាពរបស់ខ្លួន និងក្រុមគ្រួសារ៖

១- ថ្ងៃ-ខែ-ឆ្នាំកំណើត

ការដាក់ថ្ងៃ-ខែ-ឆ្នាំកំណើតលើ Facebook ផ្ទាល់ខ្លួន ប្រាកដណាស់ វាអនុញ្ញាតឱ្យមិត្តភក្តិរបស់លោកអ្នកដឹង និងផ្ញើសារជូនពរ ឬរៀបចំពិធីខួបកំណើតដ៏ភ្ញាក់ផ្អើលមួយជូន។ តែសូមកុំភ្លេចថា ថ្ងៃ-ខែ-ឆ្នាំកំណើតនេះ បូករួមទាំងឈ្មោះ និងអាសយដ្ឋានរបស់លោកអ្នកទៀត វាអាចជាផ្នែកមួយនៃព័ត៌មាន សម្រាប់ជនដែលមានគំនិតមិនល្អ អាចទស្សទាយដឹងពីចិត្តគំនិតរបស់លោកអ្នកបាន។ ជាងនេះទៅទៀត ពួកគេអាចកាន់តែងាយស្រួលក្នុងការស្មានដឹងពីលេខកូដគណនីធានាគារ ឬលេខកូដសម្ងាត់ និងព័ត៌មានលំអិតផ្ទាល់ខ្លួនរបស់លោកអ្នក ក៏ថាបាន។

២– លេខទូរស័ព្ទទំនាក់ទំនង

ការដាក់លេខទូរសព្ទក្នុង Facebook Profile ប្រហែលជាគំនិតល្អមួយកាលពី ៦ ឆ្នាំមុន ខណៈដែលវាមានការទាមទារពីក្រុមហ៊ុនបណ្តាញសង្គម ក្រោមហេតុផលនៃការបង្កើនសន្តិសុខ។ ប៉ុន្តែ ធាតុពិតវាមិនដូច្នោះទេ។ ព្រោះថា មនុស្សមួយចំនួនអាចនឹងស្គាល់លេខអ្នក ហើយហៅទូរសព្ទមករំខាន ឬបោកបញ្ឆោតអ្នកដើម្បីគោលបំណង​អ្វីមួយបាន។

៣– Tag​ ពី Friend ខិលខូច

អ្នកលេង Facebook ខ្លះចូលចិត្ត Tag រូបថតមិនល្អ មិនសមគួរនឹងមើល ដល់ Friend របស់ពួកគេ។ បើលោកអ្នកឋិតក្នុងចំណោមនោះ គួរតែបិទ Tag ពី Friend ទាំងនោះចោលទៅ បើមិនចង់ឱ្យ Friend ដទៃមើលឃើញរូបភាពទាំងនោះ។ ដើម្បីធ្វើដូចនេះ សូមចូលទៅកាន់មឺនុយ Settings -> Timeline and Tagging -> Who can add things to my timeline រួចចុចយកជម្រើស On/Enable លើមុខងារ ‘review posts…’។

៤– រូបថតក្មេងតូចៗក្នុងគ្រួសារ

នៅលើបណ្តាញសង្គម Facebook យើងមិនដឹងថា នរណាមានគំនិតមិនល្អចំពោះយើងនោះទេ ខណៈដែលការបង្ហោះរូបថត-វីដេអូនៅលើវា អាចឱ្យគេឯងចូលមើលបានយ៉ាងងាយ។ ម្លោះហើយ ការបង្ហាញរូបកូនតូចៗឱ្យ Friend បានឃើញ និងចុច Like/Love និងប្រាប់ថាកំពុងនៅទីកន្លែងនេះនៅទីកន្លែងនោះ អាចជាការប្រឈមនឹងគ្រោះថ្នាក់មួយ ពោលគឺ ចោរអាចនឹងតាមដានលួច ឬចាប់ជំរិតកូនក្មេងតូចៗរបស់លោកអ្នកបាន។ ម្លោះហើយ លោកអ្នកគួរតែយកចិត្តទុកដាក់ចំពោះបញ្ហាសន្តិសុខនេះ ជាជាងការចង់បង្ហាញអ្នកដទៃអំពីភាពគួរឱ្យស្រឡាញ់របស់ពួកគេ។

៥– ទីកន្លែងដែលលោកអ្នកកំពុងឋិតនៅ និងសាលាដែលសមាជិកគ្រួសារក្មេងតូចៗទៅរៀន

លោកអ្នកមិនគួរបង្ហោះរូបភាព-វីដេអូ ឬព័ត៌មានណាមួយដែលបង្ហាញឱ្យ Friend នៅលើ Facebook ដឹងថាខ្លួនកំពុងឋិតនៅទីកន្លែងណា ហើយសមាជិកគ្រួសារក្មេងៗរៀននៅសាលាណា ឬពេលណានោះទេ។ ព្រោះវាអាចផ្តល់ឱកាសដល់ជនខិលខូចតាមដានពួកគេដើម្បីប្រព្រឹត្តសកម្មភាពអាក្រក់អ្វីមួយលើពួកគេបាន។ យោងតាមរបាយការណ៍ពី NSPPC កំណត់ត្រាករណីរំលោភផ្លូវភេទលើកុមារបានកើនឡើងដល់ ៣៦,៤២៩ ករណីក្នុងឆ្នាំ ២០១៣-២០១៤ នៅចក្រភពអង់គ្លេស ដែលនេះគឺជាអត្រាខ្ពស់បំផុតធៀបនឹងកាលពីមួយទសវត្សរ៍មុន។

៦– Location Services

ការបើកនូវមុខងារ Location Services ​ចោលនៅលើទូរសព្ទ អាចនឹងអនុញ្ញាតឱ្យនរណាម្នាក់ដែលប្រហែលជាមានបំណង ឬគ្មានបំណងប្រព្រឹត្តអំពើអាក្រក់លើរូបលោកអ្នក ដឹងពីទីកន្លែងដែលលោកអ្នកកំពុងឋិតនៅបាន។ ដូច្នេះ បើមិនចាំបាច់ទេនោះ លោកអ្នកគួរតែបិទវាចោលទៅ!

៧- ថ្នាក់លើរបស់លោកអ្នក

លោកអ្នកមួយចំនួនតែងតែចូលចិត្តបញ្ចេញអារម្មណ៍ពិត ឬបង្ហាញសកម្មភាពផ្សេងៗរបស់ខ្លួនឱ្យ Friend បានដឹងនៅលើបណ្តាញសង្គម។ ប៉ុន្តែ អ្នកប្រហែលជាភ្លេចគិតហើយថា Facebook គឺជាកន្លែងសាធារណៈ អាចឱ្យគ្រប់គ្នាចូលមើលអ្វីៗដែលដាក់បង្ហោះបាន បើមិនមានការកំណត់មុខងារ Privacy ត្រឹមត្រូវ។ សួរថា ចុះបើក្នុងចំណោមពួកគេ គឺមានអ្នកគ្រប់គ្រង ឬថ្នាក់លើរបស់លោកអ្នក?

៨– Tag កន្លែងដែលលោកអ្នកឋិតនៅ

ការចុច Tag ទីកន្លែងដែលខ្លួនកំពុងឋិតនៅដាក់លើ NewFeed ក្នុងទំព័រ Facebook របស់ខ្លួន គឺបីដូចជាការប្រកាសប្រាប់ពីអាសយដ្ឋានរបស់លោកអ្នកទៅដល់សាធារណជនឱ្យបានដឹងអីចឹង។ ដូច្នេះ វាពិតជាពិបាកសន្និដ្ឋានណាស់ថា តើមាននរណាខ្លះកំពុងមានបំណងអាក្រក់ ឬតាមដានលើរូបលោកអ្នកនោះ។ ដូច្នេះ ចង់មិនចង់គួរតែបញ្ឈប់ទម្លាប់នេះភ្លាមទៅ៕