ក្រុមហ៊ុន Boom Technology បានប្រកាសនាពេលថ្មីៗនេះថា ក្រោមការចាប់ដៃគូជាមួយក្រុមហ៊ុនអភិវឌ្ឍន៍យានអវកាស Virgin Galactic ខ្លួន​នឹងផលិតចេញនូវយន្តហោះដឹកអ្នកដំណើរដែលមានល្បឿនលឿនជាងសំឡេងឱ្យបានរួចរាល់មុនបំណាច់ឆ្នាំ ២០២០។

ក្រុមហ៊ុនបានបន្ថែមថា យន្តហោះល្បឿនផ្លេកបន្ទោរ ឬហៅថា Supersonic នោះ នឹងមានល្បឿនលឿនជាងយន្តហោះដឹកអ្នកដំណើរនានាក្នុងពេលបច្ចុប្បន្ន ហើយនិងលឿនជាងសំឡេងរហូតដល់ទៅពីរដង ពោលគឺ វានឹងអាចហោះហើរក្នុងល្បឿន​អតិបរមា ២,៣៣៥ គីឡូម៉ែត្រ/ម៉ោង (លឿនជាងយន្តហោះយោធាដែលលឿនបំផុតរហូតដល់ ១១ ដង)។

លោក Blak Scholl ស្ថាបនិក និងជាប្រធានក្រុមហ៊ុន Boom បានថ្លែងថា ការបង្កើតយន្តហោះនេះឡើង គឺដោយសារតែខ្លួនមានបំណងចង់បំបែកកំណត់ត្រាថ្មីក្នុងប្រវត្តិសាស្ត្រយន្តហោះពាណិជ្ជកម្ម។

លោកបន្ថែមថា ជាមួយយន្តហោះដ៏លឿននេះ អ្នកដំណើរអាចធ្វើដំណើរទៅមករវាងទីក្រុងញូយ៉ក និងទីក្រុងឡុងដ៍ ដោយចំណាយពេលត្រឹមតែ ៣ ម៉ោង នឹង ១៥ នាទី និងរវាងពីទីក្រុងសានហ្រ្វានស៊ីស្កូ និងតូក្យូ ដោយចំណាយពេលត្រឹមតែ ៥ ម៉ោងកន្លះ ប៉ុណ្ណោះ។

លោក Scholl បានថ្លែងបញ្ចាក់បន្ថែមនៅឯសន្និសិទ International Aviation Association Wings of Change ក្នុងសប្តាហ៍នេះថា ខ្លួននឹងដាក់សាកល្បងកូនយន្តហោះ Boom ជាលើកដំបូងក្នុងឆ្នាំ ២០១៨ បន្ទាប់មក នឹងដាក់សាក ល្បងយន្តហោះ Boom ធុនធំអាចដឹកអ្នកដំណើរបាន ៥៥ នាក់ ឱ្យបានមុនបំណាច់ឆ្នាំ ២០២០៕

//www.youtube.com/watch?v=nJkM-ykKRxg

ប្រភពព័ត៌មាន: yahoo