ស្រ្តីជនជាតិអូស្រ្តាលីម្នាក់ បានទទួលរងការរលាកផ្ទៃមុខធ្ងន់ធ្ងរដោយសារតែកាស Beats របស់ក្រុមហ៊ុន Apple ផ្ទុះឆេះ ខណ:នាងកំពុងធ្វើដំណើរតាមជើងយន្ត​ហោះ​​មួយពីទីក្រុងប៉េកាំង ទៅទីក្រុងមែលប៊ន កាលពីខែកុម្ភ:។ នេះបើយោងតាមការឱ្យដឹងពីសារព័ត៌មានអូស្រ្តាលី Associated Press។

ក្រោយការកើតមានឧប្បតិ្តវហេតុនេះ ស្រ្តីរងគ្រោះក៏បានដាក់ពាក្យបណ្តឹងដើម្បីទាមទារសំណង​ពីក្រុមហ៊ុន Apple ដែរ ប៉ុន្តែ ត្រូវបានទាត់ចោល ហើយទម្លាក់មូលហេតុនៃការផ្ទុះឆេះ ទៅលើថ្មដែលក្រុមហ៊ុនរកឃើញថា វាមិនមែនជារបស់ខ្លួន តែជារបស់ក្រុមហ៊ុនដទៃ។

តំណាងម្នាក់របស់ក្រុមហ៊ុន Apple ដែលបានទិញយកក្រុមហ៊ុនកាស Beats ក្នុងឆ្នាំ ២០១៤ បានប្រាប់មេធាវីរបស់ស្រ្តីរងគ្រោះថា ឆ្លងកាត់តាមការស៊ើបអង្កេតរបស់ក្រុមហ៊ុន មូលហេតុនៃការឆាបឆេះកាសស្តាប់ត្រចៀកម៉ាក Beats ដើរដោយថាមពលថ្មនោះ គឺដោយសារតែវាប្រើប្រាស់ថ្មរបស់ភាគីទីបីម៉ាក AAA។

គួរបញ្ជាក់ថា ស្រ្តីរងគ្រោះដែលសុំមិនបញ្ចេញឈ្មោះនោះ បានគេងអំឡុងពេល​ហោះ​ហើរ នៅពេលដែលសំឡេងផ្ទុះខ្លាំងមួយត្រូវបានអ្នកដំណើរដទៃផ្សេងទៀតឮ។ នេះបើយោងតាមរបាយការណ៍ពីការិយាល័យសុវត្ថិភាពដឹកជញ្ជូនរបស់ប្រទេសអូស្រ្តាលីចេញផ្សាយក្នុងខែមីនា៕

ប្រភពព័ត៌មាន: theverge