ព័ត៌មានបច្ចេកវិទ្យា

កាតម៉ាស៊ីនកុំព្យូទ័រនេះ អាចដាក់តាមហោប៉ៅបាន ចេញលក់ ខែសីហា

នៅឯព្រឹត្តិការណ៍ CES ឆ្នាំទៅមិញ ឃើញថា ក្រុមហ៊ុន Intel បានបង្ហាញចេញនូវកាតម៉ាស៊ីនកុំព្យូទ័រមួយបន្ទះ (Compute Card) ដែលមានសមត្ថភាពស្មើទៅនិងម៉ាស៊ីនកុំព្យូទ័រទាំងមូល ថែមទាំងមានទំហំតូច ប៉ុនកាតធនាគារសព្វថ្ងៃ។ មកដល់ក្នុងសប្ដាហ៍នេះ ក្រុមហ៊ុនផលិតគ្រឿងកុំព្យូទ័រ Intel បានធ្វើការប្រកាសចេញ Compute Card ជាផ្លូវការហើយ។ ផលិតផលថ្មីនេះ ឃើញមានវត្តមានរបស់ក្រុមហ៊ុន LG ចូលរួមសហការ ដោយបានធ្វើការដោតសាក Compute Card ជាមួយនិង អេក្រង់ទូរទស្សន៍របស់ខ្លួន ដើម្បីបង្គុំឧបករណ៍ទាំង ២ ឲ្យក្លាយទៅជាកុំព្យូទ័រមួយគ្រឿង។

យោងតាមគេហទំព័រ The Verge បានឲ្យដឹងថា កាតម៉ាស៊ីនកុំព្យូទ័រនេះក៏អាចនឹងធ្វើការតភ្ជាប់ទៅកាន់ ថេប្លេត និងឧបករណ៍បញ្ចាំងរូបភាពទៅលើក្តារខៀន បានផងដែរ។ ម្យ៉ាងវិញទៀត Compute Card នឹងមានចេញជា ៤ ជម្រើសផ្សេងៗគ្នា តាមរូបភាពបង្ហាញខាងក្រោម៖

គួរបញ្ជាក់ដែរថា Compute Card នឹងចាប់ផ្ដើមចេញលក់នៅ ខែសីហា ខាងមុខនេះ រីឯតម្លៃក្រុមហ៊ុនមិនបានបញ្ជាក់ប្រាប់នៅពេលនេះទេ។ យ៉ាងណាក្ដី វាត្រូវបានគេរំពឹងទុកជាមុនថា នឹងក្លាយទៅជាម៉ាស៊ីនកុំព្យូទ័រដែលអាចដាក់តាមហោប៉ៅបាន ដ៏មានឥទ្ធិពល នាពេលអនាគត៕

ប្រភព៖ The Verge

មតិយោបល់