ខណ:នៅតែប្រហែលជា ២-៣ ខែ ទៀតប៉ុណ្ណោះ ដែលទូរសព្ទដៃ iPhone ជំនាន់បន្ទាប់នឹងត្រូវបានប្រកាសចេញជាផ្លូវការ រូបរាងរបស់វាថ្មីមួយ ត្រូវបានគេទម្លាយឱ្យឃើញយ៉ាងច្បាស់ក្រឡែតបំផុតមិនធ្លាប់មាន និងត្រូវបានចែកផ្សាយពេញគេហទំព័រព័ត៌មានបច្ចេកវិទ្យាធំៗ។
រូបរាង iPhone 8 ចុងក្រោយនេះ ត្រូវបានកាន់បង្ហាញដោយអ្នកទម្លាយព័ត៌មានសម្ងាត់ដ៏គួរឱ្យជឿទុកចិត្តម្នាក់ឈ្មោះ Benjamin Geskin ដាក់បង្ហោះនៅលើទំព័រ Twitter ឈ្មោះ VenyaKeskin1។ វាមានរចនាបទស្រដៀងទៅនឹងទូរសព្ទ iPhone 7 បច្ចុប្បន្ន ប៉ុន្តែ មានគែមអេក្រង់ជុំវិញស្តើងជាង។ នៅលើផ្ទៃអេក្រង់របស់វា Geskin បានបិទរូបអេក្រង់របស់ iPad Pro ស៊េរីថ្មីពីលើ ព្រមទាំងដាក់ក្រាលដោយកញ្ចក់ផ្លាស្ទិកការពារអេក្រង់មួយជាន់ ដែលនេះមើលទៅ វាហាក់មិនដូចជា iPhone 8 មែនទែនប៉ុន្មាននោះទេ។
ទោះយ៉ាងណា វាអាចបង្ហាញពីការរចនាចុងក្រោយរបស់ទូរសព្ទ iPhone ស៊េរីឆ្នាំ ២០១៧ ជាមួយលក្ខណ:សម្បត្តិនៃអេក្រង់ស្ទើរគ្មានស៊ុម ដែលមជ្ឈដ្ឋានទូទៅជឿជាក់ថា ក្រុមហ៊ុន Apple នឹងបញ្ចេញម៉ូដវាយ៉ាងដូច្នេះ ដើម្បីប្រកួតប្រជែងជាមួយ Samsung Galaxy S8 និង LG G6 ដែលបានបំពាក់អេក្រង់ហ៊ុមព័ទ្ធជុំវិញដោយគែមដ៏ស្តើងរួចទៅហើយ។
ដោយឡែក តាមរយ:រូបរាងបែកធ្លាយថ្មីនេះ គេមិនអាចកត់សម្គាល់ដឹងទេថា តើប៊ូតុង Home មានបំពាក់បន្ទះស្គេនក្រយៅដៃឬក៏អត់នោះទេ ខណ:កន្លងមកមានការអះអាងពីរផ្ទុយគ្នា ដោយខ្លះថា Apple នឹងបំពាក់វានៅលើប៊ូតុង Home ដែលឋិតនៅលើផ្ទៃកញ្ចក់អេក្រង់ផ្ទាល់តែម្តង ឯខ្លះវិញថា វានឹងប្តូរទៅដាក់នៅខាងក្រោយខ្នងទូរសព្ទ។
ចុងក្រោយនេះដែរ ក៏មានការលើកសម្អាងដាច់ដោយឡែកផ្សេងទៀតថា Apple នឹងពន្យាពេលចេញ iPhone 8 ច្រើនខែ ដោយសារការច្របាច់បញ្ចូលអង្គញាណ Touch ID ក្រោមស្រទាប់កញ្ចក់អេក្រង់ជួបឧបសគ្គ៕
#iPhone8 Hands-on Video
(sort of 😁)(Dummy + Printed Picture + Screen Protector) pic.twitter.com/gkKjWH0tLe
— Ben Geskin (@BenGeskin) June 23, 2017
អត្តបទ: សេង, ប្រភពព័ត៌មាន: cultofmac
មតិយោបល់