Jaguar គឺជាក្រុមហ៊ុនផលិតរថយន្តស៊េរីប្រណិតៗលំដាប់ខ្ពស់មួយរបស់អង់គ្លេស ដែលបានប្រកាសថាកំពុងត្រៀម​បញ្ចេញរថយន្តអគ្គិសនីដំបូងបង្អស់របស់ខ្លួន ដើម្បីប្រជែងជាមួយរថយន្តស៊េរី Model X របស់ក្រុមហ៊ុនផលិតរថយន្តអាមេរិក Tesla នៅក្នុងឆ្នាំ ២០១៨ ខាងមុខ។

រថយន្តដើរដោយថាមពលអាគុយប្រភេទប្រាំកៅអីដំបូងបង្អស់មិនធ្លាប់មានរបស់ក្រុមហ៊ុននោះ នឹងផលិតចេញដោយយកលំនាំតាម​រចនាបទរថយន្តអគ្គិសនី I-PACE ដែលបានតាំងបង្ហាញនៅឯពិព័រណ៍ Motor Show នាទីក្រុងហ្សឺណែវកាល​ពីខែមិនា។
Jaguar I-PACE ប្រើប្រព័ន្ធស៊ីមាំងដូចជា F-PACE (ម៉ូឌែលប្រើម៉ាស៊ីនសាំង) ដែលត្រូវបានគេហៅវាថា ជារថយន្ត SUV (កៅអីប្រាំ) ស្រស់សង្ហារបំផុតក្នុងឆ្នាំ ២០១៥។

នៅក្នុងសេចក្តីថ្លែងការណ៍មួយ Jaguar បានគូសបញ្ជាក់ថា រថយន្តអគ្គិសនីស៊េរីថ្មីនោះ នឹងមានរូបរាងខុសពីរថយន្តបែបស្ព័រ ប្រភេទបួនកៅអី ប្រាំកៅអី និងរថយន្តម៉ាក Jaguar ដែលក្រុមហ៊ុនធ្លាប់ផលិតចេញ។ វានឹងបំពាក់អាគុយកម្លាំង ៩០ គីឡូវ៉ាត់ ដែលផ្តល់ថាមពលទៅឱ្យម៉ូទ័រអគ្គិសនីកម្លាំង​ ២០០ សេះ ពីរ នៅខាងក្រោមតួអ័ក្សរបស់រថយន្តទាំងសងខាង។

ក្រមហ៊ុនដែលមានមូលដ្ឋាននៅទីក្រុង Coventry មួយនេះ អះអាងថា រថយន្តអគ្គិ​សនីស៊េរីឆ្នាំ​ ២០១៨ របស់ខ្លួន នឹងអាចបរបានចម្ងាយជាង ៣៥០ គីឡូម៉ែត្រ ហើយវត្តមានរបស់​វា នឹងបង្ហាញឡើងដើម្បីប្រជែងជាមួយរថយន្តអគ្គិសនីរបស់ក្រុមហ៊ុន Tesla ម៉ូឌែល Model X 75D ដែលអាចបើកបរបានចម្ងាយជិត ៤០០ គីឡូម៉ែត្រ និងដែលមានតម្លៃចាប់ពី ៨៥,៥០០ ដុល្លារ។

ក្រុមហ៊ុនបន្ថែមថា រថយន្តអាគុយលំដាប់ប្រណិតនោះ នឹងមានកម្លាំងថាមពលសរុប ៤០០ សេះ មានកម្លាំងរង្វិលជុំ ៥១៦ ញ៉ូតុនម៉ែត្រ ហើយអាចបង្កើនសន្ទុះល្បឿនពី ០ ទៅ ១០០ គីឡូម៉ែត្រ/ម៉ោង ដោយប្រើថេរវេលា ៤ វិនាទី ដែលសមត្ថភាពនេះ គឺខ្លាំងជាង Model X75D និង 90D របស់ក្រុមហ៊ុន​ Tesla ដែលប្រើថេរវេលា ៦ វិនាទី និង​ ៤.៨ វិនាទី។

រហូតមកទល់ពេលនេះ Jaguar មិនទាន់បានប្រកាសប្រាប់ឱ្យដឹងពីតម្លៃរថយន្តអគ្គិសនីលំដាប់ប្រណិតដំបូងរបស់ខ្លួននេះនោះទេ ប៉ុន្តែ នាយកប្រតិបត្តិក្រុមហ៊ុន Jaguar Land Rover គឺលោក Joe Eberhardt បង្ហើបឱ្យដឹងថា តម្លៃរបស់វាអាចត្រដំប្រសងនឹងរថយន្តប្រណិតៗម៉ាក Porsche របស់ក្រុមហ៊ុនអាល្លឺម៉ង់៕

ប្រភពព័ត៌មានៈ businessinsider