អាមេរិក៖ នៅសល់តែប៉ុន្មានថ្ងៃទៀត ក្រុមហ៊ុន Apple នឹងរៀបចំព្រឹត្តិការណ៍ធំលំដាប់ពិភពលោក​ប្រចាំ​ឆ្នាំ ដោយនៅក្នុងនោះត្រូវបានគេរំពឹងថា នឹងបង្ហាញវត្តមាន iPhone ជំនាន់ថ្មី ឬ iPhone 7។ តើ iPhone ថ្មី មានលក្ខណៈពិសេសអ្វីខ្លះ?

យោងតាមការចេញផ្សាយរបស់សារព័ត៌មាន 9to5Mac និងតាមការវិភាគរបស់ស្ថាប័ន KGI បានឲ្យដឹងថា iPhone ជំនាន់ថ្មី មានលក្ខណៈពិសេសធំៗ ៣គឺ ទី១ ប្រើប្រាស់ Chip A10 និងមាន​អង្គប្រតិបត្តិ 2.4GHz ជាមួយនឹង RAM ទំហំ 3GB ដែលធ្វើឲ្យ iPhone ថ្មី ដើរលឿនជាងម៉ូដែលមុន។ ចំណុចទី២ គឺ iPhone ថ្មី មានម៉ូដែល 32GB, 128GB និង 256GB ពោលគឺគ្មាន 16GB រួមជាមួយនឹង​ពណ៌ថ្មី Dark Black និង Piano Black។ រីឯចំណុចចុងក្រោយគឺ Apple បានបន្ថែមលក្ខណៈពិសេស Water-resistance ធន់នឹងទឹកជាមុន។

គួរបញ្ជាក់ផងដែរថា Apple នឹង​រៀបចំព្រឹត្តិការណ៍ធំនៅថ្ងៃទី០៧ ខែកញ្ញាខាងមុខនេះ ដោយនៅក្នុងព្រឹត្តិការណ៍នោះ គេរំពឹងថា នឹងបង្ហាញវត្តមាន iPhone 7៕