ព័ត៌មានបច្ចេកវិទ្យា

Vivo ប្រកាសចេញស្មាតហ្វូនស៊េរីថ្មី ២ ម៉ូឌែល បំពាក់កាមេរ៉ាមុខភ្លោះ ទំហំ ២០ មេហ្គាភិចសែល

ក្រុមហ៊ុនផលិតស្មាតហ្វូនរបស់ប្រទេសចិន Vivo បានប្រកាសចេញជាផ្លូវការនូវទូរសព្ទដៃត្រកូល X ស៊េរីថ្មី ចំនួន ២ ម៉ូឌែល គឺ X9s និង X9s Plus ជាមួយការបំពាក់កាមេរ៉ាមុខសម្រាប់ថតរូបបែប Selfie ពីរ ដោយមួយមានទំហំដល់ទៅ ២០ មេហ្គាភិចសែល។ ម៉ូឌែលថ្មីទាំងពីរ ត្រូវបានបង្កើនថាមពលថ្មខ្លាំងជាងមុន និងទំហំតួខ្លួនធំជាងម៉ូឌែលមុនរបស់វាបន្តិច ហើយដាក់ឱ្យដំណើរការលើប្រព័ន្ធប្រតិបត្តិការ Android Nougat ជំនាន់ចុងក្រោយ​ចេញពីរោងចក្រ។

 

ចំពោះ X9s និង​ X9s Plus គឺមានសមត្ថភាព Hardware ប្រហាក់ប្រហែលគ្នា ពោលគឺ ខុសតែទៅលើទំហំអេក្រង់ និងថាមពលថ្មប៉ុណ្ណោះ ដោយម៉ូឌែល Plus មានថាមពលថ្ម ៤,០១៥​ មីល្លីអំព៊ែរ ប្រើអេក្រង់ Full HD ប្រភេទ AMOLED ទំហំ ៥.៨៥ អីុញ មេរ៉ាមុខទំហំ ២០/៥ មេហ្គាភិចសែល និងកាមេរ៉ាក្រោយទំហំ ១៦ មេហ្គាភិចសែល ប្រើបន្ទះឈីប Snapdragon 653 ជំនាន់ Octa-core ជាមួយបន្ទះស្គេននៅខាងមុខលើប៊ូតុង Home និង RAM ទំហំ ៤ ជីហ្គាបៃយ៍ និងអង្គចង់ចាំជាប់ម៉ាស៊ីនទំហំ ៦៤ ជីហ្គាបៃយ៍ ចំណែក X9s ប្រើថាមពលថ្ម ៣៣២០ មីល្លីអំព៊ែរ អេក្រង់ទំហំ ៥.៥​ អីុញ និងបន្ទះឈីប Snapdragon 652។

គួរបញ្ជាក់ថា Vivo ស៊េរី X9s មិនមែនជាស្មាតហ្វូនកាមេរ៉ាមុខភ្លោះដំបូងគេនោះទេ ពោលគឺ វាក៏មានដែរនៅ​លើស្មាតហ្វូនរបស់ក្រុមហ៊ុន LG, Oppo, និង Alcatel ប៉ុន្តែ កាមេរ៉ាភ្លោះទាំងនោះ ច្រើនផ្តោតលើសមត្ថភាពផ្តិត​យករូបភាពក្នុងមុំធំទូលាយ ខុសពី Vivo ដែលដាក់បន្ថែមកាមេរ៉ាមួយគ្រាប់ទៀតដើម្បីបន្ថែមមុខងារថតរូបព្រាលក្រោយ និងច្បាស់ខាងមុខ ឬច្រាស់មកវិញ។

សម្រាប់តម្លៃវិញ Vivo X9s Plus ត្រូវបានដាក់លក់ក្នុងតម្លៃប្រហែល ៤៤០ ដុល្លារ (តម្លៃលក់ក្នុងតំបន់) ចំណែក X9s ថ្លៃប្រមាណ ៣៩៩ ដុល្លារ៕

ប្រភពព័ត៌មាន: theverge, gsmarena

មតិយោបល់