កាមេរ៉ាប្រភេទថតរូបសកម្មភាពជំនាន់បន្ទាប់របស់ក្រុមហ៊ុន GoPro គឺ Hero 6 Black បានលេចធ្លាយយ៉ាងច្បាស់ក្រឡែត ស្របពេលថ្ងៃប្រកាសចេញផ្លូវការខិតជិតចូលមកដល់ នាថ្ងទី ២៨ កញ្ញា។

រូបភាពថ្មីមួយចំនួន ដែលត្រូវគេប្រទះឃើញក្នុងហាង Best Buy នៅប្រទេសកាណាដា បានបង្ហាញឱ្យឃើញរូបរាង Hero 6 Black នៅក្នុងប្រអប់ដែលមានបញ្ចាក់ពីលក្ខណៈសម្បត្តិសំខាន់ៗមួយចំនួន។ ក្នុងនោះ កាមេរ៉ារបស់វាមានទំហំ ១២ មេហ្គាភិចសែល មានសមត្ថភាពអាចថតវីដេអូខ្នាត 4K ក្នុងកម្រិតល្បឿន ៦០ ប៉ុស្តិ៍/វិនាទី និងការពារជម្រាបទឹកក្នុងជម្រៅ ១០ ម៉ែត្រ។

នៅលើប្រអប់ផ្នែកចំហៀង គេមានបញ្ជាក់ថា Hero 6 Black អាចថតវីដេអូបានក្នុងល្បឿនរហូតដល់ ២៤០ ប៉ុស្តិ៍/វិនាទី ជាមួយខ្នាត ១០៨០p ហើយវាប្រើប្រាស់ CPU ឈ្មោះ GP1។

ចំពោះការរចនាវិញ គឺពុំមានបង្ហាញពីភាពខុសគ្នារវាង Hero 5 Black ឡើយ ហើយបើយោងតាមប្រភពរូបភាពដដែល វានឹងត្រូវបានដាក់លក់ក្នុងតម្លៃ ៦៤៩ ដុល្លារ (បូកទាំងពន្ធ) នៅក្នុងប្រទេសកាណាដា បន្ទាប់បីប្រកាសចេញជាផ្លូវការនៅថ្ងៃទី ២៨ កញ្ញា ខាងមុខ៕

ប្រភពព័ត៌មានៈ