Apple កំពុងសាកល្បងកម្មវិធីកក់ទុកថ្ម iPhone សម្រាប់អ្នកត្រូវការផ្លាស់ប្តូរថ្ម

ចាប់តាំងពីក្រុមហ៊ុន Apple ប្រកាសផ្តល់ជូននូវតម្លៃពិសេសសម្រាប់ការផ្លាស់ប្តូរថ្ម iPhone ស៊េរីចាស់ៗពី ៧៩ ដុល្លារមក ២៩ ដុល្លារមក ថ្ម iPhone ក្នុងស្តុកសម្រាប់ស៊េរី 6 និង 6 Plus ជាដើម នៅតាមហាងក្នុងតំបន់ផ្សេងៗក៏ចាប់ផ្តើមដាច់ជាបណ្តើរៗ។

ប្រឈមនឹងបញ្ហានេះ ក្រុមហ៊ុនបាននិងកំពុងសាកល្បងនូវកម្មវិធីថ្មីមួយឈ្មោះ Apple Support ក្នុងប្រទេសកាណាដា សម្រាប់អនុញ្ញាតឱ្យអ្នកប្រើប្រាស់ iPhone អាចធ្វើការកក់ទុកថ្មថ្មីសម្រាប់ផ្លាស់ប្តូរទូរសព្ទរបស់ពួកគេ។

នៅពេលកក់រួច ពួកគេនឹងទទួលបានសារមួយប្រាប់ថា តើតំបន់របស់ពួកគេរស់នៅមានថ្មថ្មីក្នុងស្តុកសម្រាប់ដោះដូរឬក៏អត់។ ហើយប្រសិនបើក្នុងរយៈពេលមួយសប្តាហ៍ ពួកគេមិនទៅប្តូរទេនោះ ការកក់នឹងត្រូវទុកជាអសារបង់ ដោយវានឹងផ្ទេរចូលស្តុកសម្រាប់បំពេញតម្រូវការអតិថិជនផ្សេងវិញ។