និស្សិតមួយក្រុម ព្រមទាំងសាស្រ្តាចារ្យនៃវិទ្យាស្ថានបច្ចេកវិទ្យាកម្ពុជា បានរួមដៃគ្នាបង្កើតកម្មវិធីទូរសព្ទដៃថ្មីមួយ ក្នុងគោលបំណងប្រើប្រាស់បច្ចេកវិទ្យាដើម្បីជួយផ្សព្វផ្សាយអំពីគោលដៅអភិវឌ្ឍប្រកបដោយចីរភាពនៅកម្ពុជា ដែលបានដាក់ចេញដោយអង្គការសហប្រជាជាតិ។

កម្មវិធីដែលអាចដំណើរការលើឧបករណ៍ដើរដោយប្រព័ន្ធប្រតិបត្តិការ iOS និង Android នេះ មានឈ្មោះថា CSDGs (Cambodia Sustainability Development Goals ឬប្រែថា គោលដៅអភិវឌ្ឍប្រកបដោយចីរភាពសម្រាប់កម្ពុជា) ដោយមានទាំងភាសាខ្មែរ និងអង់គ្លេស។

កម្មវិធី CSDGs បានចងក្រងនូវព័ត៌មានស្តីអំពីរបៀបវីរ:សំខាន់ៗទាំង ១៧ ចំណុច (មានមួយចំណុចបន្ថែមសម្រាប់កម្ពុជា) ដែលមេដឹកនាំពិភពលោក បានមូលមតិគ្នាជាឯកច្ឆ័ន្ទ និងសម្រេចអនុម័តកាលពីខែកញ្ញា ឆ្នាំ ២០១៥ ហើយចូលជាធរមាននៅថ្ងៃទី ០១ មករា ២០១៦។

របៀបវីរ:ទាំងនោះរួមមាន បញ្ចប់ភាពក្រីក្រគ្រប់ទម្រង់នៅគ្រប់ទីកន្លែង បញ្ចប់គ្រោះអត់ឃ្លានស្មើសូន្យ ធានាសុខភាព និងសុខុមាលភាពមាំមួនរបស់មនុស្សគ្រប់រូបនិងគ្រប់វ័យ ធានាការអប់រំប្រកបដោយគុណភាព សមភាពយេនឌ័រ ជាដើម ហើយកំណត់ថា នឹងសម្រេចឱ្យបាននៅឆ្នាំ ២០៣០។

លោកអ្នកអាចទាញយកកម្មវិធី CSDGs តាមតំណរភ្ជាប់នេះ Android, iOS៕