ពេលខ្លះលោកអ្នកប្រហែលជាចង់លុបសារដែលខ្លួនច្រឡំដៃផ្ញើទៅកាន់មិត្តភក្តិតាម​កម្មវិធី Facebook Messenger ហើយ ជាពិសេសគឺ សារសំឡេងតែម្តង។​ បើដូច្នេះមែន តើលោកអ្នកដឹងត្រូវធ្វើម៉េចអត់? តាមពិតទៅចំពោះរបៀបលុបគឺត្រូវបាន Facebook ដាក់បញ្ចូលយូរហើយ ប៉ុន្តែអ្នកខ្លះនៅតែមិនដឹង។ សម្រាប់របៀប​លុបសារសំឡេងនេះ គឺអាចធ្វើបានតាម ២ របៀបគឺ៖

១- លុបនៅពេលមិនទាន់បញ្ជូនចេញ 

រាល់ពេលដែលលោកអ្នកចុចថតសំឡេងដើម្បីផ្ញើចូលក្នុងបន្ទប់សន្ទនា ឬ Chatroom ក្នុងកម្មវិធី Messenger ម្តងៗ ពិតជាងាយស្រួលណាស់ គ្រាន់តែចុចជាប់លើប៊ូតុងថតសំឡេងរូបក្បាលមេក្រូ ហើយពេលនិយាយចប់ព្រលែងដៃចេញ នោះសារសំឡេងនឹងបញ្ចូនទៅដោយស្វ័យប្រវត្តិតែម្តង។

ប៉ុន្តែ ក្នុងករណីលោកអ្នកនិយាយច្រឡំ ឬខុសទាស់ពាក្យពេចន៍អីមួយ លោកអ្នកអាចដកវាមិនឱ្យបញ្ចូនទៅបាន ប្រសិនបើមិនទាន់ប្រលែងដៃចេញពីប៊ូតុងថត។ ពោលគឺ ដោយគ្រាន់តែនៅពេលកំពុងចុចថត អូសម្រាមដៃឡើងលើរហូតដល់ឃើញ​សញ្ញា X ពណ៌ក្រហមមួយលេចឡើង រួចព្រលែងដៃចេញ នោះសំលេងថតរបស់អ្នកនឹងរលប់បាត់ជាមិនខាន។

២- លុបបន្ទាប់ពីបញ្ជូនទៅហើយ

ដើម្បីលុបសារសំឡេង ក៏ដូចជាសារដទៃផ្សេងទៀតរបស់លោកអ្នកដែលបញ្ចូនរួច​ គឺងាយបំផុត ដោយលោកអ្នកគ្រាន់តែចុចជាប់លើសារណាមួយដែលខ្លួនចង់លុប រហូតដល់មឺនុយ Popup មួយបង្ហាញឡើងនៅខាងក្រោម រួចចុចលើពាក្យ Delete (រូបធុងសម្រាម) -> Delete ជាការស្រេច៕