Post News Media ព័ត៌មានបច្ចេកវិទ្យា Facebook បញ្ច...

Facebook បញ្ចប់ការសាកល្បងញែក News Feed ជាពីរ នៅប្រទេស ៦ រាប់ទាំងកម្ពុជា

ក្រុមហ៊ុន Facebook នៅថ្ងៃព្រហស្បត្តិ៍ម្សិលមិញ បានសម្រេចបិទបញ្ចប់ការសា​ក​ល្បងផ្តាច់ News Feed របស់អ្នកប្រើប្រាស់ជាពីរ នៅក្នុងប្រទេសចំនួន ៦ ដែលក្នុង​នោះក៏មានប្រទេសកម្ពុជាផងដែរ។

ការសម្រេចបែបនេះ គឺធ្វើឡើងក្រោយមានមតិរិះគន់ជាច្រើនពីសំណាក់អ្នកប្រើប្រាស់បណ្តាញសង្គមរបស់ខ្លួន និងដោយសារលទ្ធផលស្ទាបស្ទង់មតិបង្ហាញថា អ្នកប្រើ Facebook ភាគច្រើនមិនពេញចិត្តចំពោះការញែកមាតិកាជាពីរបែបនោះ ហើយថា វាមិនបានជួយឱ្យពួកគេខ្លួនភ្ជាប់ទំនាក់ទំនងជាមួយញាត្តិមិត្តបានល្អជាងមុនឡើយ។

គួរបញ្ជាក់ថា ការសាកល្បងបែងចែកមាតិកាព័ត៌មានដែលបង្ហោះចេញពី Facebook Page ចេញពីផ្ទាំង News Feed របស់អ្នកប្រើប្រាស់ Facebook ទៅដាក់ដាច់ដោយឡែកក្នុង Explore Feed គឺធ្វើឡើងចាប់តាំងពីខែតុលា នៅក្នុងប្រទេសបូលីវី កម្ពុជា ហ្គាតេម៉ាឡា ស៊ែប៊ី ស្លូវ៉ាគី និងស្រីលង្កា។

លោក Adam Mosseri ប្រធានគ្រប់គ្រង News Feed របស់ក្រុមហ៊ុន Facebook បាននិយាយថា​​៖ ក្រុមហ៊ុនបណ្តាញសង្គមរបស់យើងសម្រេចបញ្ចប់ការសាកល្បង និងរក្សា News Feed តែមួយដូចមុនវិញ​ ពិព្រោះអ្នកប្រើប្រាស់់បានប្រាប់យើងនៅក្នុងសម្រង់ស្ថិតិថា​ ពួកគេមិនពេញចិត្តចំពោះការផ្លាស់ប្តូរនោះទេ។

លោក Adam បន្ថែមថា ក្រុមហ៊ុនបានទទួលមតិរិះគន់ពីអ្នកប្រើប្រាស់ក្នុងប្រទេសទាំង ៦ ថា ក្រុមហ៊ុនធ្វើឱ្យពួកគេពិបាកក្នុងការចូលទៅកាន់ព័ត៌មានសំខាន់ដែលពួកខ្លួនចូលចិត្ត។

ទាក់ទងទៅនឹងព័ត៌មាននេះដែរ ស្ថាប័នប្រព័ន្ធផ្សព្វផ្សាយនៅក្នុងប្រទេសកម្ពុជា បានសម្តែងការស្វាគមន៍យ៉ាងខ្លាំង។

លោក ណុប វី និពន្ធនាយក នៃស្ថានីយ៍វិទ្យុសំឡេងប្រជាធិបតេយ្យ បានថ្លែងថា៖ អ្នកប្រើប្រាស់បណ្តាញសង្គម Facebook នៅក្នុងប្រទេសកម្ពុជា នឹងអាចទទួលបានព័ត៌មានពីស្ថាប័នដែលពួកគេចូលចិត្តម្តងទៀត ក្រោយពីចំនួនអ្នកចូលមើលមានការធ្លាក់ចុះយ៉ាងកំហុគពី ៣០% ទៅ ៤០% អំឡុងការសាកល្បង។

ទោះយ៉ាងណា ក្រុមហ៊ុន Facebook មិនទាន់បានបញ្ជាក់ថា ខ្លួននឹងដក Explore Feed ចេញវិញនៅថ្ងៃណានោះទេ ខណ:នៅពេលនេះ វានៅតែមានលើបណ្តាញសង្គមនៅឡើយ ប៉ុន្តែ វាអាចនឹងត្រូវដកចេញឆាប់ៗនេះហើយ៕

ប្រភពព័ត៌មាន: Reuters