(ស៊ុយអែដ)៖ នាយកប្រតិបត្តិ (CEO) ក្រុមហ៊ុនផលិតគ្រឿងបរិក្ខាទូរគមនាគមន៍ស៊ុយអែដ បានចុះចេញពី​​តំណែងភ្លាមៗ ដោយមិនបានបញ្ជាក់ពីមូលហេតុច្បាស់លាស់ ហើយខាងក្រុមហ៊ុនក៏មិនបាន​បញ្ជាក់អ្វី​ទាក់​ទង​នឹងការលាឈប់នេះដែរ។

នៅក្នុងសេចក្ដីប្រកាសព័ត៌មានរបស់ក្រុមហ៊ុន Ericsson បានឲ្យដឹងថា លោក Hans Vestberg ជានាយកប្រតិបត្តិ បានសម្រេចចិត្តលាឈប់ពីតំណែង ហើយក្រុមហ៊ុនបានសម្រេចជ្រើសរើសលោក Jan Frykhammar បច្ចុប្បន្នមានតំណែងជា​ប្រធានហិរញ្ញវត្ថុ ឲ្យឡើងកាន់តំណែងជំនួសលោក Vestberg មួយរយ:សិន ទម្លាំរហូតដល់ក្រុមហ៊ុនជ្រើសតាំង​នាយកប្រតិបត្តិថ្មី។

លោក Vestberg បានចូលបម្រើការងារនៅក្នុងក្រុមហ៊ុនទូរគមនាគមន៍មួយនេះ នៅឆ្នាំ១៩៩១ ជា​ប្រធាន​​សេវាកម្មសកល ហើយនៅឆ្នាំ២០០៧ ត្រូវបានតែងតាំងជា​ប្រធានហិរញ្ញវត្ថុ និងនៅឆ្នាំ២០១០ ក៏ត្រូវបាន​តែងតាំងជានាយកប្រតិបត្តិតែម្ដង។

មិនមានប្រភពច្បាស់លាស់ណាមួយអាចបញ្ជាក់បានពី​មូលហេតុនៃការលាឈប់របស់លោក Vestberg ឡើយ ប៉ុន្តែមានព័ត៌មានមួយ បានឲ្យដឹងថា ប្រហែលជាមកពី​អត់មិនអាច​ដោះស្រាយនូវបញ្ហាមួយ​ចំនួន​នៅ​ក្នុងក្រុមហ៊ុនបាន ជាពិសេសគឺ​ការធ្លាក់ចុះនៃតម្លៃផ្សារហ៊ុន ចាប់តាំងពីឆ្នាំ២០១៥៕