ចិន៖ បន្ទាប់ពីប្រាក់ចំណូលនៃការលក់នៅពាក់កណ្ដាលឆ្នាំនេះកើនឡើង ៤០ភាគរយ ក្រុមហ៊ុន​បច្ចេកវិទ្យា​យក្សចិន Huawei បានប្រកាស​ឲ្យដឹង​ពីគោលដៅ​នៃការលក់ស្មាតហ្វូន​នៅក្នុង​ឆ្នាំនេះ។

នៅក្នុងសេចក្ដីប្រកាសព័ត៌មាន Huawei បានបញ្ជាក់ថា ក្រុមហ៊ុនបានកំណត់គោលដៅ​លក់ស្មាតហ្វូន​ឲ្យ​បាន​យ៉ាងតិច ១៤០លានគ្រឿង​នៅក្នុងឆ្នាំ​នេះ ព្រមទាំងបើក​ហាងលក់រាយ (Retail stores) ថ្មីឲ្យបាន ១៥.០០០​កន្លែងនៅជុំវិញពិភពលោក។ គិតត្រឹមថ្ងៃទី៣១ ខែឧសភា ឆ្នាំនេះ Huawei មានហាងលក់រាយ​​ចំនួន ៣៥.០០០កន្លែង នៅជុំវិញពិភពលោក ដោយក្នុងនោះមាន ១១.០០០កន្លែងនៅក្នុង​ប្រទេសចិន,​៦.៥០០កន្លែងនៅ​អាស៊ី, ៦.២០០កន្លែងនៅ​អឺរ៉ុប និង​១.៥០០កន្លែង​នៅអាមេរិកខាងត្បូង។

កាលពីឆ្នាំមុន ក្រុមហ៊ុនផលិតស្មាតហ្វូនលំដាប់ទី៣របស់ពិភពលោកមួយនេះ លក់ស្មាតហ្វូនបាន ១០៨លាន​គ្រឿង ហើយបើយកគោលដៅថ្មី ធៀបនឹងឆ្នាំមុន គឺកើនឡើង ៣០ភាគរយ៕