Post News Media ព័ត៌មានបច្ចេកវិទ្យា បុរសម្នាក់ក្ដ...

បុរសម្នាក់ក្ដៅចិត្តខ្លាំងពេក រហូតដល់ថ្នាក់ដាក់ពាក្យប្ដឹង ក្រុមហ៊ុន Samsung

រដ្ឋផ្លរីដា: លោក Jonathan Strobel រស់នៅក្នុងរដ្ឋផ្លរីដា បានដាក់ពាក្យបណ្ដឹង​ទៅកាន់តុលាការ​ប្រឆាំង​នឹងក្រុមហ៊ុន Samsung បន្ទាប់ពី​ស្មាតហ្វូន​ Galaxy Note 7 របស់គាត់ផ្ទុះឆេះ និងបានបង្ករបួសស្នាម​ដល់​ភ្លៅរបស់គាត់។ នេះបើយោងតាមការចុះផ្សាយរបស់សារព័ត៌មាន Reuters នៅថ្ងៃទី១៨ ខែកញ្ញា។

លោក Kieth Pierro មេធាវីរបស់លោក Jonathan Strobel បានបញ្ជាក់ថា កូនក្ដីរបស់គាត់​បានរងរបួស​នៅថ្ងៃទី០៩ ខែកញ្ញា ខណ:ដែលគាត់បានដើរកម្សាន្តនៅក្នុងហាងលក់ទំនិញមួយកន្លែង ហើយចំណែក​របួសនោះគឺធ្ងន់ធ្ងរខ្លាំងផងដែរ ដូច្នេះហើយទើកកូនក្ដីរបស់គាត់សម្រេចចិត្តដាក់ពាក្យបណ្ដឹង។

លោកមេធាវី មិនបានបញ្ជាក់ពី​សំណងដែល​កូនក្ដីរបស់គាត់ទាមទារឡើយ ប៉ុន្តែបើតាមការ​ឲ្យដឹងពី​ប្រភព​ជិតស្និទ្ធ បានលួចបង្ហើបថា Samsung ប្រហែលជាត្រូវផ្ដល់សំណងយ៉ាងគាប់ចិត្តដល់​លោក Strobel ដោយក្នុងនោះរួមមានប្រាក់សំណងទៅលើការបាត់បង់ពេលវេលាធ្វើការ, សំណងជំងឺចិត្ត និង​សំណងទៅលើការព្យាបាលរបួស​ ជាដើម។

ចាប់តាំងពីមានរបាយការណ៍ផ្ទុះឆេះ Galaxy Note 7 មក ក្រុមហ៊ុន Samsung បានប្រកាសប្រមូលនៅទូទាំងពិភពលោក ប៉ុន្តែការប្រមូលនេះទៀតសោតនៅមិនទាន់បាន​បញ្ចប់នៅឡើយ ជាពិសេសគឺ​តួលេខនៃការប្រមូលបានមកវិញគឺតិចតូចបំផុត។

គួរបញ្ជាក់ផងដែរថា ប៉ុន្មានថ្ងៃមុននេះ បុគ្គលិក Amazon ម្នាក់បានប្ដឹង Samsung ផងដែរ បន្ទាប់ពី​ Galaxy 7 Edge របស់គាត់ផ្ទុះឆេះ និងបានបង្កជារបួសភ្លៅគាត់យ៉ាងធ្ងន់ធ្ងរ៕

samsung-electronics-galaxy-note-7

ប្រភព៖ Phone Arena & Reuters