តៃវ៉ាន់: Galaxy Note 7 ថ្មីរបស់ក្រុមហ៊ុន​ Samsung ប្រហែលជាមានបញ្ហាថ្ម ដូចម៉ូដែល​ចាស់ ព្រោះថា ក្រោយពីប្ដូរថ្មីហើយ នៅកើតមានករណីផ្ទុះឆេះដដែល ដែលបញ្ហានេះ បាននិងកំពុង​ធ្វើ​ឲ្យ Samsung ធ្វើការស៊ើបអង្កេត។

នៅថ្ងៃទី០៨ ខែតុលាម្សិល​មិញនេះ Galaxy Note 7 បានផ្ទុះឆេះឡើងនៅតៃវ៉ាន់ ប៉ុន្តែជាសំណាង​ល្អមិនបណ្ដាលឲ្យមានរបួសដល់ម្ចាស់ទូរស័ព្ទ។ ម្ចាស់ទូរស័ព្ទនោះត្រូវបានគេស្គាល់ឈ្មោះថា Lai​ ភេទស្រី វ័យ ២៦ឆ្នាំ ទើបតែប្ដូរ Galaxy Note 7 ថ្មី បាន ១០ថ្ងៃប៉ុណ្ណោះ។

នាង Lai បាននិយាយថា នាងបានដឹកឆ្កែដើរកម្សាន្ត រំពេចនោះស្រាប់តែមាន​ផ្សែងហុយចេញ​ហោប៉ៅរបស់នាង ដូច្នេះនាងក៏បានយក Galaxy Note 7​ ចេញពីហោប៉ៅ រួចបោះវាទៅដី ដោយ​រង់ចាំមើលវាឆេះរហូតរលត់។

ពាក់ព័ន្ធនឹងករណីនេះ ក្រុមហ៊ុន Samsung ប្រចាំតៃវ៉ាន់ បានបញ្ជាក់ថា កំពុងតែធ្វើការស៊ើបអង្កេត ថាតើវាពិតជាបានផ្ទុះឆេះដោយសារតែថ្ម ឬបញ្ហាអ្វីផ្សេង។

គួរបញ្ជាក់ផងដែរថា នៅប៉ុន្មានថ្ងៃនេះមុននេះ Galaxy Note 7 បានផ្ទុះឆេះនៅលើ​យន្តហោះ​ ដែល​ត្រៀមនឹងធ្វើការហោះហើរ ដោយបានបង្កឲ្យមានភាពចលាចល ហើយនៅថ្ងៃនេះផងដែរ ក្រុមហ៊ុន Samsung បានចេញសេចក្ដីប្រកាសមួយ ដោយឲ្យក្រុមហ៊ុនដែលជាដៃគូ និង​អតិថិជន​ ទាំងអស់ មេត្ដាស្ងប់អារម្មណ៍ ព្រោះ Samsung កំពុងធ្វើការស៊ើបអង្កេត៕