គម្រោងអភិវឌ្ឍន៍ទំនប់ពហុបំណងបាត់ដំបង ដែលជាគម្រោងអភិវឌ្ឍន៍ប្រព័ន្ធធារាសាស្រ្តដ៏ធំ ស្ថិតក្នុងខេត្តបាត់ដំបង សម្រេចការងារបានប្រមាណ ៩៨ភាគរយហើយ។ នេះបើយោងតាមការចេញផ្សាយនៅលើគេហទំព័ររបស់ ក្រសួងធនធានទឹក និងឧតុនិយម។

គម្រោងនេះ នឹងតភ្ជាប់ពីភ្នំជីប៉ាង ទៅភ្នំកូប ដើម្បីបង្កើតជាអាងទឹក ដែលមានសមត្ថភាពស្តុកទឹកបាន ២៨៦លានម៉ែត្រគូប ហើយមានទីតាំងសំណង់មេ នៅក្នុងឃុំផ្លូវមាស ស្រុករតនមណ្ឌល ខេត្តបាត់ដំបង។

ទឹកដែលប្រមូលស្តុកទុកនេះ នឹងត្រូវទម្លាក់តាមដងស្ទឹងសង្កែ ចែកចាយតាមប្រឡាយមេ ប្រឡាយរង ទៅស្រោចស្រពលើផ្ទៃដីស្រូវវស្សាចំនួនជិត ៥ម៉ឺនហិកតា និងស្រូវប្រាំងជាង ១ម៉ឺនហិកតា នៅក្នុងស្រុករតនមណ្ឌល បាណន់ សង្កែ និងស្រុកមោង​ឫស្សី។

លើសពីនេះទៅទៀត គម្រោងនេះ ក៏អាចទាញយកថាមពលវារីអគ្គិសនីចំនួន ១៣.១ មេហ្គាវ៉ាត់ ព្រមទាំងកាត់បន្ថយទឹកជំនន់ និងផ្តល់ទឹកសម្រាប់ការប្រើប្រាស់ ដល់ក្រុងបាត់ដំបងផងដែរ។

គួរបញ្ជាក់ដែរថា គម្រោងអភិវឌ្ឍន៍នេះ គ្រោងនឹងបញ្ចប់ជាស្ថាពរ នៅមុនបុណ្យចូលឆ្នាំប្រពៃណីខ្មែរខាងមុខនេះ៕