ក្នុងឱកាសបុណ្យចូលឆ្នាំប្រពៃណីចិន និងវៀតណាមខាងមុខនេះ ការដុតក្រដាសសែន នៅលើចិញ្ចើមផ្លូវ ឬទ្រូងផ្លូវសាធារណ: ត្រូវបានហាមឃាត់ជាដាច់ខាត។ នេះបើយោងតាមសេចក្តីជូនដំណឹងរបស់ រដ្ឋបាលរាជធានីភ្នំពេញ បានចេញផ្សាយនៅថ្ងៃនេះ។
ការដុតក្រដាសសែន ត្រូវប្រើធុងដែក ឬឆ្នាំងដី ដើម្បីដុត មិនអាចដុតនៅតាមចិញ្ចើមផ្លូវ ឬទ្រូងផ្លូវសាធារណ:នោះទេ ដើម្បីចូលរួមបង្ការ គ្រោះថ្នាក់អគ្គិភ័យ ដែលអាចកើតមាន។
លើសពីនេះទៅទៀត បងប្អូនប្រជាពលរដ្ឋ ត្រូវប្រុងប្រយ័ត្នក្នុងការអុជទៀនធូប ក្រដាសសែន ភ្លើងចង្រ្កាន ចរន្តអគ្គិសនី ដែលអាចបង្កឲ្យមានគ្រោះថ្នាក់អគ្គិភ័យ កើតឡើងជាយថាហេតុ។
ចំពោះការដុតផាវ កាំជ្រួច ឬបង្កសម្លេងផ្ទុះគ្រប់ប្រភេទ ការលេងល្បែងស៊ីសង ត្រូវបានហាមឃាត់ជាដាច់ខាត ហើយការដង្ហែក្បួនផ្សេងៗបែបសាសនា និងប្រពៃណី ត្រូវមានការអនុញ្ញាត។
គួរបញ្ជាក់ដែរថា ជនណាបំពានលើសេចក្តីណែនាំនេះ ឬប្រព្រឹត្តិល្មើស បង្កឲ្យមានចលាចលក្នុងសង្គម បាត់បង់ សណ្តាប់ធ្នាប់ សន្តិសុខ សុវត្ថិភាព និងរបៀបរៀបរយសាធារណ: ត្រូវទទួលទោសតាមច្បាប់ជាធរមាន៕
មតិយោបល់