នាវាទេសចរណ៍ Diamond Princess ជានាវាទី ១៩ សម្រាប់ឆ្នាំ ២០១៧ ដែលបាននាំយកភ្ញៀវទេសចរប្រមាណជិត ៤ពាន់នាក់ មកលេងកម្ពុជា នៅព្រឹកនេះ។ នេះបើយោងតាមគេហទំព័ររបស់កំពង់ផែស្វយ័តក្រុងព្រះសីហនុ ចេញផ្សាយប្រមាណជា ១០នាទីមុននេះ។

នាវានេះ ធ្វើដំណើរមកពីកំពង់ផែ Hochiminh ប្រទេសវៀតណាម ផ្ទុកអ្នកដំណើរ ២,៧៦០នាក់ និងនាវិកចំនួន ១,០៨៩នាក់ ហើយបានចូលចតនៅកំពង់ផែស្វយ័តក្រុងព្រះសីហនុ នឹងចាកចេញទៅកំពង់ផែ Laemchabang ប្រទេសថៃ នៅថ្ងៃនេះវេលាម៉ោង ៤ល្ងាច។

កំណើនភ្ញៀវទេសចរទាំងនេះ ដោយសារបច្ចុប្បន្នប្រទេសកម្ពុជាមានសន្តិសុខ សុវត្ថិភាព និងមានការអភិវឌ្ឍរីកចំរើននូវហេដ្ឋារចនាសម្ព័ន្ធនានា ក្នុងដំណើរកម្សាន្តរបស់ភ្ញៀវទេសចរជាតិ និងអន្តរជាតិមកលេងកម្សាន្តនៅខេត្តព្រះសីហនុ ជាតំបន់ឆ្នេរសមុទ្រទាក់ទាញភ្ញៀវទេសចរ មិនចាញ់ខេត្តសៀមរាប អង្គរនោះទេ ជាពិសេសតំបន់កោះ មានដូចជា កោះរ៉ុង ជាដើម៕