សាលារាជធានីភ្នំពេញ បានសិក្សាជាមួយធនាគារឯកទេស វីង ពីគម្រោងរៀបចំ ម៉ាស៊ីនឆូតកាតតាមរថយន្តក្រុងសាធារណ: ដែលនឹងអាចដាក់ដំណើរការនាពេលឆាប់ៗនេះ។ នេះបើយោងតាមលើកឡើង កាលពីពេលថ្មីៗនេះ របស់លោក អៀង អូននី អភិបាលរងរាជធានីភ្នំពេញ។
សាលារាជធានីភ្នំពេញ បានសម្រេចឲ្យរៀបចំមន្រ្តីជំនាញបច្ចេកទេស រៀបចំសៀវភៅបន្ទុក និងកិច្ចសន្យាស្តីពីការវិនិយោគលើការសិក្សា និងការបំពាក់ឧបករណ៍ទូទាត់តាមអេឡិចត្រូនិច។
ការប្រើកាតឆូត នៅពេលប្រើប្រាស់រថយន្តក្រុងសាធារណ: នឹងផ្លាស់ប្តូរពីការប្រើប្រាស់ថវិកាដោយផ្ទាល់ មកជាការប្រើប្រាស់កាតប្រចាំខែ ឬប្រចាំឆ្នាំ ដែលបង្កភាពងាយស្រួលដល់ ការគ្រប់គ្រងចំណូលឲ្យមានប្រសិទ្ធភាព។
លើសពីនេះទៅទៀត ការប្រើប្រាស់កាតឆូត នឹងកាត់បន្ថយចំនួនបុគ្គលិក លុបបំបាត់ភាពមិនប្រក្រតីផ្សេងៗ នឹងបង្កភាពងាយស្រួលដល់អ្នកធ្វើដំណើរផងដែរ គឺចំនេញពេលវេលា។
គួរបញ្ជាក់ផងដែរថា សាលារាជធានីភ្នំពេញ ក៏គ្រោងនឹងពង្រីកខ្សែរថយន្តក្រុងសាធារណ:ពីចំនួន ៣ខ្សែ ដែលកំពុងដំណើរការនាពេលបច្ចុប្បន្ន ឲ្យកើនដល់ ១០ខ្សែ៕
មតិយោបល់