កម្ពុជា បានស្នើឲ្យអង្គការ JICA ពិនិត្យលទ្ធភាពលើ ការបង្កើតរោងចក្រផលិតទឹកស្អាត នៅខេត្តស្វាយរៀង បន្ទាប់ពីវិសាលភាពនៃវិស័យទឹកស្អាត ក្រោមគម្រោងរបស់ JICA បានគ្របដណ្តប់តាមទីប្រជុំជន និងបណ្តាខេត្តសំខាន់ៗរួចមកហើយ។ នេះបើយោងតាមការឲ្យដឹងពី គេហទំព័ររបស់ក្រសួងឧស្សាហកម្ម និងសិប្បកម្ម។

លោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានជួបពិភាក្សាជាមួយលោក SUGANO Yuichi ប្រធានតំណាងថ្មីនៃអង្គការ JICA ប្រចាំនៅកម្ពុជា អំពីគម្រោងនានាលើវិស័យទឹកស្អាតនៅកម្ពុជា។

ការអនុវត្តគម្រោងនានាលើវិស័យទឹកស្អាត របស់អង្គការ JICA បានជាប់ឈ្មោះដ៏ល្អនៅកម្ពុជា ហើយរដ្ឋាករទឹកស្វយ័តក្រុងភ្នំពេញ បានទទួលពានរង្វាន់លើគុណភាពទឹកស្អាតជាបន្តបន្ទាប់ពី ស្ថាប័នវាយតម្លៃអន្តរជាតិនានា។

ដូចនេះ លោក ចម ប្រសិទ្ធ ស្នើដល់អង្គការ JICA ឲ្យបង្កើតរោងច្រកផលិតទឹកស្អាតនៅខេត្តស្វាយរៀង បន្ទាប់ពីវិស័យទឹកស្អាតបានដើរយ៉ាងល្អរួចទៅហើយ នៅខេត្តបាត់ដំបង កំពង់ចាម សៀមរាប កំពង់ធំ កំពត និងមណ្ឌលគីរីជាដើម។

ជាការឆ្លើយតប ភាគីជប៉ុន បានបង្ហាញនូវការសហការគាំទ្រ និងពិនិត្យទៅលើ មតិខាងលើ។

គួររម្លឹកដែរថា គិតមកទល់ពេលនេះ សេវាករផ្គត់ផ្គង់ទឹកស្អាតទូទាំងប្រទេស ដែលទទួលបានអាជ្ញាប័ណ្ណពី រាជរដ្ឋាភិបាលមានចំនួន ១៤៧អាជីវកម្ម៕