ធនាគារអភិវឌ្ឍន៍អាស៊ី (ADB) បានសម្រេចផ្តល់កម្ចី ៩.២លានដុល្លារអាមេរិក ដល់ក្រុមហ៊ុន Sunseap Group ដែលផ្គត់ផ្គង់ថាមពលសូឡា ធំជាងគេ នៅកម្ពុជា។
ក្រុមហ៊ុន Sunseap បាននឹងកំពុងវិនិយោគលើគម្រោងថាមពលសូឡា តម្លៃជាង ១២.៥លានដុល្លារអាមេរិក បន្ទាប់ពីចុះកិច្ចព្រមព្រៀងទិញលក់ថាមពលអគ្គិសនីជាមួយ អគ្គិសនីកម្ពុជា (EDC) សម្រាប់រយ:ពេល ២០ឆ្នាំ។
គម្រោងនេះ គឺធ្វើឡើងនៅលើផ្ទៃដីជាង ១០ហិកតា នៅក្រុងបាវិត ដែលគ្រោងនឹងចាប់ផ្តើមដំណើរការ នៅខែសីហាខាងមុខនេះ។
យ៉ាងណាមិញ ថាមពលសូឡាផលិតបាន គឺប្រមាណ ១០មេហ្កាវ៉ាត់ ខណ:តម្រូវការប្រើប្រាស់ក្នុងខេត្តស្វាយរៀងមានរហូតដល់ ៤០មេហ្កាវ៉ាត់ ពោលគឺ ផ្គត់ផ្គង់បានប្រមាណ ១ភាគ៤ នៃតម្រូវការ។
ទោះបីជា ការផ្គត់ផ្គង់ថាមពលសូឡា នៅមានកម្រិតទាបនៅឡើយ តែវាជាថាមពលកកើតឡើងវិញ ដែលជាថាមពលស្អាត នឹងជាកត្តាជម្រុញឲ្យមានការវិនិយោគបន្ថែមទៀត លើប្រភេទថាមពលនេះផងដែរ។
គួររម្លឹកដែរថា របាយការណ៍សេដ្ឋកិច្ចប្រចាំឆ្នាំរបស់ ADB បានឲ្យដឹងថា ផលិតផលសរុបក្នុងស្រុក នឹងកើនដល់ ៧.១ភាគរយ ក្នុងឆ្នាំ ២០១៧ និង ២០១៨ ពោលគឺ ខ្ពស់ជាង ៧ភាគរយ ក្នុងឆ្នាំ ២០១៦បន្តិច៕
មតិយោបល់