ភ្នំពេញ: សមត្ថកិច្ចនគរបាលព្រហ្មទណ្ឌខណ្ឌសែនសុខ បានឃាត់ខ្លួនបុរសម្នាក់ ដោយចោទពីសង្ស័យពាក់ព័ន្ធជួញដូរនិងប្រើប្រាស់គ្រឿងញៀនខុសច្បាប់ ព្រមទាំងដកហូតថ្នាំញៀនប្រភេទក្រាមសថ្លា ដែលនៅជាប់តាមខ្លួនមួយចំនួនផង។

ការចាប់ឃាត់ខ្លួននេះបានធ្វើឡើងកាលពីវេលាម៉ោង១១និង៣០នាទី ព្រឹកថ្ងៃទី២៦ ខែមេសា ឆ្នាំ២០១៧ នៅចំណុចមុខផ្ទះសំណាក់ដីមាស ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យមានឈ្មោះ សី សារ៉ុន ហៅផ្លយ ភេទប្រុស អាយុ៣៩ឆ្នាំ មុខរបរមិនពិតប្រាកដ ស្នាក់នៅផ្ទះជួលភូមិ៣ សង្កាត់ស្រះចក ខណ្ឌដូនពេញ មានស្រុកកំណើតភូមិអន្សងអក ឃុំអន្សងអក ស្រុកកំពង់ត្របែក ខេត្តព្រៃវែង។

តាមសម្តីសមត្ថកិច្ចបានឲ្យដឹងថា មុនពេលឃាត់ខ្លួនជនជាប់ចោទរូបនេះ គឺកម្លាំងសមត្ថកិច្ចបានប្រើប្រាស់ជំនាញ ដោយប្រើយុទ្ឋសាស្ត្រ បើចាប់ចោរទាល់តែបន្លំខ្លួនធ្វើចោរ ឬប្រើជនសម្ងាត់ឲ្យដើរជាមួយចោរ ទើបអាចចាប់ចោរបាន។

ចំពោះមធ្យោបាយចាប់ជនសង្ស័យនៅពេល សមត្ថកិច្ចបានបញ្ជូនមនុស្សបង្កប់ឬហៅថា”ខ្លាស”ឲ្យអូសទាញជនសង្ស័យមកចូលអន្ទាក់សមត្ថកិច្ចដើម្បីងាយស្រួលឆែកឆេរ ហើយនៅពេលនោះរកឃើញថ្នាំញៀនប្រភេទម៉ាទឹកកក ចំនួន១កញ្ចប់តូចនិង១កញ្ចប់ធំ ដែលជនសង្ស័យបានលាក់ក្នុងក្នុងហោប៉ៅខោផ្នែកខាងស្តាំទើបឃាត់ខ្លួនតែម្តង។

នៅចំពោះមុខសមត្ថកិច្ចជនសង្ស័យបានសារភាពថាថ្នាំញៀន ទាំងនេះវាជារបស់ខ្លួនពិតមែនដោយខ្លួនបានទិញក្នុងតម្លៃ១០ម៉ឺនរៀល ពីគេបន្តមកដែរ ដើម្បីយកទៅចែកចាយលក់បន្ត តែខណ:យកថ្នាំឲ្យគេក៏ត្រូវសមត្ថកិច្ចឃាត់ខ្លួនតែម្តង ដោយមិនដឹងថា អ្នកដែលទិញថ្នាំញៀនពីខ្លួន នោះជាមនុស្សសម្ងាត់របស់ប៉ូលិស។

បច្ចុប្បន្នជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ដើម្បីស្រាវជ្រាវនិងបញ្ជូនទៅតុលាការចាត់ការតាមនីតិវិធីច្បាប់៕