គិតត្រឹម ៤ខែ ដើមឆ្នាំ ២០១៧នេះ ចំណូលអង្គរ បានមកពីការលក់សំបុត្រ ទទួលបាន ៣៩លានដុល្លារអាមេរិក ដែលកើនឡើង ៦០ភាគរយ បើធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាមទីភ្នាក់ងារសារព័ត៌មានជាតិ។

ក្នុងខែមេសា ឆ្នាំនេះ ភ្ញៀវទេសចរជាង ១.៨សែននាក់ មកទស្សនារមណីយដ្ឋានអង្គរ បង្កើតចំណូលជាង ៨លានដុល្លារអាមេរិក កើនឡើងប្រមាណ ១០២ភាគរយ បើធៀបនឹងពេលដូចគ្នា កាលពីឆ្នាំមុន។ នេះបើយោងតាមសេចក្តីប្រកាសរបស់គ្រឹះស្ថានអង្គរ។

ចាប់ពីថ្ងៃទី ១ ខែកុម្ភៈ ឆ្នាំ ២០១៦ សំបុត្រចូលទស្សនារមណីយដ្ឋានអង្គរវត្ត បានកែប្រែតម្លៃថ្មី គឺឡើងដល់ ៣៧ដុល្លារអាមេរិក សម្រាប់ចូលទស្សនា ១ថ្ងៃ ដោយរាល់ការទិញសំបុត្រទាំងអស់ គឺកាត់ ២ដុល្លារអាមេរិក សម្រាប់ចូលមូលនិធិមន្ទីរពេទ្យគន្ធបុប្ផា។

យ៉ាងណាមិញ នៅខែមីនា ចំនួនភ្ញៀវទេសចរ មកទស្សនារមណីយដ្ឋានអង្គរ មិនចុះថមថយនោះទេ នឹងបានបង្កើតចំណូលជាង ១០លានដុល្លារអាមេរិក ដោយជាង ៤.៥សែនដុល្លារអាមេរិក ត្រូវបានបែងចែកដល់មូលនិធិមន្ទីរពេទ្យកុមារគន្ធបុប្ផា។

រាជរដ្ឋាភិបាល បានធ្វើការកែសម្រួល តម្លៃសំបុត្រចូលទស្សនារមនីយដ្ឋានអង្គរ សម្រាប់ជនបរទេសនេះ គឺដើម្បីរក្សាតម្លៃសំបុត្រ ចូលទស្សនាអង្គរឲ្យ មាននិរន្តរភាព ដោយហេតុផលថា តម្លៃបណ្ណថ្មី ៣៧ដុល្លារអាមេរិក គឺនៅទាបជាង តម្លៃសំបុត្រ ២០ដុល្លារអាមេរិក ដែលបានអនុវត្តន៍ កាលពី ២០ឆ្នាំមុន រហូតមកដល់ពេលនេះ។

មួយវិញទៀត អង្គរ ជាសម្បត្តិបេតិកភណ្ឌជាតិ ជាបេតិកភណ្ឌវប្បធម៌ ដ៏អស្ចារ្យនៅលើពិភពលោក ជាគោលដៅទេសចរណ៍ដ៏ធំ មានប្រាង្គប្រាសាទជាច្រើន ដែលមានវិសាលភាពធំធេង និងមានតម្លៃ មហាសាល ចំពោះការកែសម្រួលថ្លៃនេះ មិនជាឧបសគ្គ ឬជាកង្វល់នោះទេ ។

គួររម្លឹកដែរថា ក្នុងខែមករា ឆ្នាំ ២០១៧ កន្លងទៅនេះ ភ្ញៀវទេសចរអន្តរជាតិ ប្រមាណ ២៨៧,០០០នាក់ បានមកទស្សនាប្រាសាទអង្គរវត្ត និងបង្កើតចំណូលពីការលក់សំបុត្របានជាង ៨លានដុល្លារអាមេរិក៕