ស្ពានអាកាសថ្មើរជើងដំបូងបង្អស់នៅកម្ពុជា បានសម្ពោធដាក់ឲ្យប្រើប្រាស់ជាផ្លូវការ ចាប់ពីថ្ងៃនេះតទៅ។ នេះបើយោងតាម រដ្ឋបាលរាជធានីភ្នំពេញ ចេញផ្សាយនៅថ្ងៃនេះ។

ស្ពានអាកាសថ្មើរជើង លើផ្លូវជាតិលេខ ៤ ចំនួន ២កន្លែង ត្រង់ចំណុចមុខសាលារៀនជម្ពូវ័ន្ត បញ្ចប់ការសាងសង់ជាផ្លូវការ និងបង្កភាពងាយស្រួលដល់ សិស្សានុសិស្ស និងប្រជាពលរដ្ឋអាចឆ្លងកាត់ផ្លូវដោយសុវត្ថិភាព។

ក្រៅពីការរៀបចំប្រព័ន្ធការពារសុវត្ថិភាព ជូនប្រជាពលរដ្ឋ ដែលឆ្លងកាត់ផ្លូវនេះ សាលារាជធានីភ្នំពេញ នឹងដោះស្រាយស្ថានភាពចរាចរណ៍នៅតំបន់នេះជាកញ្ចប់តែម្តង ដោយគ្រោងនឹងពុះចែកសួនច្បារនៅកណ្តាលទ្រូងផ្លូវ ហើយនិងស្ថាបនាស្ពានអាកាសចោមចៅ ដែលធ្វើឲ្យប្រព័ន្ធចរាចរណ៍ កាន់តែប្រសើរឡើង។

គួរបញ្ជាក់ថា ប្រសិនបើគម្រោងនេះ ទទួលបានការគាំទ្រពីប្រជាពលរដ្ឋ សាលារាជធានីភ្នំពេញ នឹងពង្រីកគម្រោងស្ថាបនានេះ នៅលើផ្លូវផ្សេងៗមួយចំនួនទៀត ដូចជា នៅមុខសាលារៀន មន្ទីរពេទ្យ និងផ្សារជាដើម៕