អាជីវកម្មរបស់ក្រុមហ៊ុន Bosch បន្តកំណើនយ៉ាងខ្លាំងក្លា ក្នុងរយៈពេល ៦ឆ្នាំជាប់ៗគ្នា ហើយក៏បានកើនឡើង ២៩ភាគរយផងដែរ ក្នុងឆ្នាំ ២០១៦ ស្របពេលដែលវិស័យសំណង់នៅកម្ពុជា ផ្ទុះឡើងដូចគ្នា។ នេះបើយោងតាមការឲ្យដឹងនៅក្នុង សន្និសីទសារព័ត៌មានប្រចាំឆ្នាំ ២០១៧ របស់ក្រុមហ៊ុន Bosch។

អាជីវកម្មផ្នែកគ្រឿងបន្លាស់យានយន្ត របស់ Bosch​ គឺជាអាជីវកម្មចម្បង សម្រាប់កំណើនទាំងមូលរបស់ក្រុមហ៊ុននៅក្នុងប្រទេសកម្ពុជា កាលពីឆ្នាំ ២០១៦។ ដោយសារការរីកចម្រើនទីផ្សារផ្នែកយានយន្ត បានធ្វើឲ្យអាជីវកម្មផ្នែកនេះសម្រេចបាននូវ អត្រាកំណើនការលក់រហូតដល់បីខ្ទង់ ដែលពុំធ្លាប់មានពីមុនមក។

យោងតាមក្រសួងសាធារណការ និងដឹកជញ្ជូន ចំនួនយានយន្តដែលបានចុះបញ្ជីនៅក្នុងប្រទេសកម្ពុជា បានកើនឡើងដល់ ៣.៧លានគ្រឿងនៅក្នុងឆ្នាំ ២០១៦ ដែលមានអត្រាកំណើន ១៦ភាគរយក្នុងមួយឆ្នាំ។

ទីផ្សារ​លក់គ្រឿងបន្លាស់រថយន្ត Bosch ទទួលបាន​ការ​រីក​ចម្រើន​ខ្លាំង​ក្លាជាងមុន​រហូត​ដល់​ទៅ ៣ ដងឯណោះ ​ដែល​ជាលទ្ធផល​នៃការ​ពង្រីក​ខ្លួនរបស់ក្រុមហ៊ុន Bosch នៅក្នុងបណ្ដា​ផលិតផល​របស់​លោក​​នៅក្នុង​ប្រទេស​​កម្ពុជា បូករួមជាមួយនឹងឧបករណ៍ប្រើប្រាស់ និងគ្រឿង​បន្លាស់ម៉ាស៊ីន​ជា​ច្រើន​​ប្រភេទផ្សេងទៀត។

អាជីវកម្មផ្នែកឧបករណ៍ជាងជំនាញ នៅតែរក្សាបានកំណើនវិជ្ជមាន ដែលកំណើននេះបានមកពីការបន្តរីកលូតលាស់នៃ ឧស្សាហកម្មសំណង់។ នៅត្រឹមបំណាច់ឆ្នាំ ២០១៦ មានគំរោងវិនិយោគសំណង់ជាង២,៦០០ ដែលបានអនុម័តរួចនៅក្នុងប្រទេសកម្ពុជា បានកើនឡើងជាង ១៤០ភាគរយ បើប្រៀបធៀបនឹងឆ្នាំ ២០១៥។ ហើយទំហំទឹកប្រាក់វិនិយោគសរុបនៃគម្រោងទាំងនោះមានរហូតដល់ទៅ ៨.៥ ពាន់លានដុល្លា។

អាជីវកម្មផ្នែកច្ចេកវិទ្យាគ្រឿងចក្របញ្ជា ក៏ទទួលបានលទ្ធផលល្អផងដែរ នៅក្នុងឆ្នាំ២០១៦។ បច្ចុប្បន្ន អាជីវកម្មផ្នែកនេះផ្តល់នូវដំណោះស្រាយសម្រាប់វិស័យផលិតកម្ម កសិកម្ម រ៉ែ ថាមពល និងសំណង់។

លោក Andre de Jong អគ្គនាយកក្រុមហ៊ុន Bosch ប្រចាំប្រទេសកម្ពុជា ឡាវ និងភូមា បានមានប្រសាសន៍ថា៖ «កម្ពុជា នៅតែជាទីផ្សារដ៏សំខាន់សម្រាប់កំណើនអាជីវកម្មរបស់ Bosch នៅក្នុងតំបន់អាស៊ីអាគ្នេយ៍ ដោយសារស្ថិរភាពនៃកំណើនសេដ្ឋកិច្ចរបស់ប្រទេសកម្ពុជា ក្នុងកំរិតប្រមាណ ៧ភាគរយ ហើយជាពិសេសកំណើននៅក្នុងផ្នែកយានយន្ត និងសំណង់។»

គួរជម្រាបដែរថា Bosch ដែលជាក្រុមហ៊ុនផ្គត់ផ្គង់បច្ចេកវិទ្យា និងសេវាកម្មនាំមុខគេលើពិភពលោក ទទួលបានកំណើនការលក់យ៉ាងខ្លាំងនៅក្នុងប្រទេសកម្ពុជាកាលពីឆ្នាំ ២០១៦ ហើយទទួលបានអត្រាកំណើនក្នុងកំរិតពីរខ្ទង់ ចាប់តាំងពីមានវត្តមាននៅប្រទេសកម្ពុជា ក្នុងឆ្នាំ ២០១០៕