កាលពីម្សិលមិញនេះ រដ្ឋាភិបាលប្រទេសអូស្រ្តាលី បានសម្រេចនាំចូលបង្គាឆៅពី ប្រទេសវៀតណាម ក្រោមលក្ខខណ្ឌនាំចូលថ្មី ក្រោយពីបានផ្អាកអស់រយៈពេលជាង ៦ខែមកនេះ។ នេះបើយោងតាមការឲ្យដឹងពី សារព័ត៌មាន Vietnamplus។

នាយកដ្ឋានកសិកម្ម និងធនធានទឹកអូស្រ្តាលី បានយល់ព្រមជាផ្លូវការ សម្រាប់ពាក្យស្នើសុំរបស់ វៀតណាម ក្នុងការនាំចូលបង្គាឆៅដែលចាប់បានដោយធម្មជាតិនៅក្នុងប្រទេសអូស្រ្តាលី សម្រាប់ធ្វើការកែច្នៃ និងបន្ទាប់មកធ្វើការនាំចេញទៅកាន់ប្រទេសអូស្រ្តាលីវិញ។

គួររម្លឹកដែរថា រដ្ឋាភិបាលអូស្រ្តាលី បានផ្អាកការនាំចូលបង្គាឆៅ កាលពីថ្ងៃទី ៧ ខែមករា ដើមឆ្នាំ ២០១៧នេះ​ ដោយសារការភ័យខ្លាចនៃជម្ងឺអុច ស ក្នុងប្រទេសអូស្រ្តាលី ហើយរដ្ឋាភិបាលវៀតណាម បានទទូចអំពាវនាវដល់រដ្ឋាភិបាលអូស្រ្តាលី ជាច្រើនដង ឲ្យដកបម្រាមរបស់ខ្លួន ក្នុងការនាំចូលបង្កង និងបង្គាឆៅ ពីវាបង្កផលអវិជ្ជមានជាច្រើន ដល់វិស័យចិញ្ចឹម និងកែច្នៃបង្គារបស់វៀតណាម។

ប្រទេសអូស្រ្តាលី បានប្រកាសផ្អាកការនំាចូលបង្កង និងបង្គាឆៅពី បណ្តាប្រទេសនៅអាស៊ី ដោយសារភ័យខ្លាចនៃ ការផ្ទុះជម្ងឺកន្ទួលពណ៌ស ដែលបង្កឡើងដោយសត្វសមុទ្រទាំងនោះ ហើយបម្រាបនេះ បានចូលជាធរមាន តាំងពីថ្ងៃទី ៩ ខែមករា មកម្ល៉េះ។

បង្គា ដែលត្រូវដឹកយកទៅកាន់អូស្រ្តាលី ក្រោយថ្ងៃ ៩ មករា ត្រូវបាននាំចេញមកវិញ ឬបំផ្លាញចោលតែម្តង ហើយទំនិញផ្សេងៗទៀត ត្រូវពិនិត្យយ៉ាងតឹងរឹងបំផុត។

យ៉ាងណាមិញ បម្រាមនេះ ត្រូវបានធ្វើឡើងក្រោយរដ្ឋាភិបាលអូស្រ្តាលី រកឃើញជម្ងឺកន្ទួលពណ៌ស នៅក្នុងកន្លែងចិញ្ចឹម ៥កន្លែង និងក្នុងទន្លេថែមទៀត តែរដ្ឋាភិបាលមិនទាន់បញ្ជាក់ច្បាស់ពី ការផ្ទុះឡើងនេះទេ។

កាលពីឆ្នាំ ២០១៦ ប្រទេសវៀតណាម​ រកចំណូលបាន ១១៤លានដុល្លារអាមេរិកពី ការនាំចេញបង្គា ទៅកាន់ប្រទេសអូស្រ្តាលី ក្នុងនោះ ៧៨ភាគរយជា បង្គា ដែលកែច្នៃរួចរាល់៕