តំបន់សេដ្ឋកិច្ចពិសេស និងភណ្ឌាគារគយមានដែនកំណត់ របស់ក្រុមហ៊ុន Kerry Worldbridge Logistics បានបើកសម្ពោធជាផ្លូវការ នៅថ្ងៃនេះហើយ។

តំបន់សេដ្ឋកិច្ចពិសេសនេះ​ ជាការបណ្តាក់ទុនរួមគ្នាជាង ១០០លានដុល្លារអាមេរិក រវាងក្រុមហ៊ុនហុងកុង Kerry Logistic Network និងក្រុមហ៊ុនក្នុងស្រុក Worldbridge International ដែលបានបើកការដ្ឋានសាងសង់តាំងពីខែ កក្កដា ឆ្នាំ​ ២០១៥កន្លងទៅ។

គម្រោងនេះ​ នឹងបង្កើតសក្តានុពលនៃ ទីផ្សារពលកម្មជូនពលរដ្ឋកម្ពុជាជាច្រើនម៉ឺននាក់ ដែលជាកត្តាសំខាន់ ក្នុងការកាត់បន្ថយភាពក្រីក្រ និងអភិវឌ្ឍសេដ្ឋកិច្ច ហើយក្រុមហ៊ុនក៏រំពឹងដែរថា នឹងអាចទាក់ទាញវិនិយោគផ្ទាល់ពីបរទេស មកបណ្តាក់ទុនវិនិយោគនៅកម្ពុជា ដោយអាចមានលំហូរសាច់ប្រាក់វិនិយោគមិនតិចជាង ៣០០លានដុល្លារអាមេរិកឡើយ។

ក្រុមហ៊ុន Kerry Worldbridge ក៏មានគោលដៅពង្រីកសមត្ថភាពរបស់ខ្លួន បង្កើតឲ្យទៅជា តំបន់ភណ្ឌាគារគយមានដែនកំណត់ដ៏ធំមួយ និងជាតំបន់សេដ្ឋកិច្ចពិសេស ដែលស្ថិតលើផ្ទៃដីជាង ៦៣ហិកតា នៅជាប់ផ្លូវជាតិលេខ ២ មានចម្ងាយប្រមាណ ១៧គីឡូម៉ែត្រពី រាជធានីភ្នំពេញ។

គួរជម្រាបដែរថា គិតមកទល់ពេលបច្ចុប្បន្ន តំបន់សេដ្ឋកិច្ចពិសេសនៅកម្ពុជា មានចំនួន ៤៥ ក្នុងនោះ ចំនួន ១២ កំពុងដំណើរការជាមួយដៃគូជាង ២៦០នាក់ និងផ្តល់ការងារជាង ៨ម៉ឺនកន្លែង។

ក្នុងឆ្នាំ ២០១៦ ទំហំពាណិជ្ជកម្មនៃតំបន់សេដ្ឋកិច្ចពិសេស ឈានដល់ ២.៨ពាន់លានដុល្លារអាមេរិក ពោលគឺ នាំចូល ១.៤ពាន់លានដុល្លារអាមេរិក និងនាំចេញ ១.៤ពាន់លានដុល្លារអាមេរិក កើនឡើងប្រមាណ ១.២ភាគរយធៀបនឹងឆ្នាំ ២០១៥៕