រថយន្តក្រុងចំនួន ១០០គ្រឿង ដែលជាជំនួយរបស់រាជរដ្ឋាភិបាលចិន បានមកដល់កម្ពុជាហើយ ដែលលត្រូវបានបែងចែកជា ៣ប្រភេទផងដែរ។ នេះបើយោងតាមគេហទំព័ររបស់ រដ្ឋបាលរាជធានីភ្នំពេញ ចេញផ្សាយកាលពីម្សិលមិញនេះ។

ក្នុងនោះរថយន្តក្រុងដែលធំជាងគេ មានរហូតដល់ទៅ ៣៧កៅអី និងរថយន្តក្រុងតូចមាន ២៧កៅអី ហើយក៏មាន រថយន្តសង្រ្គោះ ជាជំនួយការនៅពេលរថយន្តដទៃជួបបញ្ហា។

ក្នុងរថយន្តក្រុងថ្មីនេះ ក៏មានបំពាក់ អេក្រង់ LED ប្រាប់ព័ត៌មានអំពី ខ្សែរត់ មានបំពាក់ប្រព័ន្ធបំពងសម្លេង និងប្រអប់ដាក់ស៊ីម សម្រាប់ឆែក GPS ដឹងពីទីតាំងរបស់រថយន្តផងដែរ។

លោក អៀង អូននី អភិបាលរងរាជធានីភ្នំពេញ ក៏បានឲ្យដឹងដែរថា រថយន្តក្រុងថ្មីទាំង ១០០គ្រឿង នឹងបំពេញចន្លោះខ្វះខាតរបស់រថយន្តចាស់ ៥៧គ្រឿង ដែលកំពុងប្រតិបត្តិការនៅលើខ្សែរត់ ៣ខ្សែ ហើយក៏មានការបន្ថែមខ្សែរត់ ២ខ្សែទៀត ដើម្បីជម្រុញឲ្យសេវាដឹកជញ្ជូនសាធារណ: កាន់តែមានប្រសិទ្ធិភាព។

បច្ចុប្បន្ន អ្នកធ្វើដំណើរតាមរថយន្តក្រុង ក្នុង ១ថ្ងៃ មានប្រមាណ ៥០០០ ទៅ ៧០០០នាក់ ដោយក្នុងនោះ អ្នកដំណើរជិះដោយឥតគិតថ្លៃមានប្រមាណ ៥០ភាគរយ៕