កាលពីម្សិលមិញនេះ លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា រដ្ឋាភិបាលថៃ ពុំមានវិធានការណាមួយ បណ្តេញពលករខ្មែរមិនស្របច្បាប់ ឲ្យចេញពីប្រទេសថៃនោះឡើយ ពោលគឺ ពលករខ្មែរ ត្រូវចុះឈ្មោះ នៅតាមការិយាល័យចុះបញ្ជីពលករបរទេស ឲ្យបានក្នុងរយៈពេល ១៥ថ្ងៃ ចាប់ពីថ្ងៃទី ២៤ ខែកក្កដា ទៅដល់ថ្ងៃទី ៧ ខែសីហា។

រដ្ឋាភិបាលថៃ នឹងរៀបចំការិយាល័យចុះឈ្មោះ នៅទីក្រុងបាងកក មាន ១០កន្លែង នឹងមាន ១កន្លែង ក្នុងរាល់ខេត្តផ្សេងៗផងដែរ។

យោងតាមតួលេខជំរឿនចុងក្រោយរបស់ភាគីថៃ បានឲ្យដឹងថា ពលករខ្មែរ កំពុងធ្វើការនៅប្រទេសថៃ មាន ១លាន ៥ម៉ឺននាក់ ខណៈពលករស្របច្បាប់ មានប្រមាណ ៧៥ម៉ឺននាក់ និងមិនស្របច្បាប់ នៅសល់ប្រមាណ ៣០ម៉ឺននាក់ នៅពុំទាន់មានឯកសារស្របច្បាប់។

លោក បានឲ្យដឹងទៀតថា រដ្ឋាភិបាលថៃ បានចេញច្បាប់ថ្មីស្តីពីការងារ ពោលគឺ ពិន័យចំពោះ ម្ចាស់ស្ថាប័នទាំងឡាយណា ដែលប្រើប្រាស់ពលករមិនស្របច្បាប់ និងពិន័យចំពោះ ពលករធ្វើការមិនស្របច្បាប់ដូចគ្នាដែរ ប៉ុន្តែច្បាប់ថ្មីនេះ នឹងត្រូវអនុវត្តនៅថ្ងៃទី ១ ខែមករា ឆ្នាំ ២០១៨។

គួរជម្រាបដែរថា ការបំពេញបែបបទស្របច្បាប់ គឺនៅមានរយៈពេល ៦ខែ រហូតដល់ថ្ងៃទី ១ ខែមករា ឆ្នាំ ២០១៨ ដោយឡែកសម្រាប់ពលករ ដែលមិនមានឯកសារគ្រប់គ្រាន់ គឺមានរយៈពេលត្រឹមតែ ១៥ថ្ងៃ សម្រាប់ទៅចុះបញ្ជី យកលិខិតបញ្ជាក់ គឺចាប់ពីថ្ងៃទី ២៤ ខែកក្កដានេះ ទៅដល់ថ្ងៃទី ៧ ខែសីហា៕