ខេត្តសានស៊ី ប្រទេសចិន ចុះអនុស្សរណ:យោគយល់គ្នាជាមួយកម្ពុជា ដើម្បីទិញកៅស៊ូកម្ពុជា ៣សែនតោន ដែលរំពឹងចាប់ផ្តើមលើកដំបូង ក្នុងឆ្នាំ ២០១៨។ នេះបើយោងតាមការឲ្យដឹងពី ក្រសួងពាណិជ្ជកម្ម។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានជួបពិភាក្សាជាមួយ លោក ហ្ចាក់គី សែចិន ដែលដឹកនាំប្រតិភូចិន និងជប៉ុន ក្នុងគោលបំណងបង្ហាញពីបំណងវិនិយោគនៅកម្ពុជា។

ជាលទ្ធផល ខេត្តសានស៊ី បានយល់ព្រមទិញកៅស៊ូកម្ពុជាចំនួន ៣សែនតោន ហើយមានក្រុមហ៊ុនជប៉ុនមួយ បង្ហាញបំណងបង្កើតកែច្នៃឈើគៀបចេញពីកម្ទេចឈើ សំបកដូងប្រេង និងរុក្ខជាតិដទៃ ដើម្បីនាំចេញទៅជប៉ុនវិញ សម្រាប់ដុតក្នុងរោងចក្រអគ្គិសនី Biomass។

យោងតាមទិន្នន័យពីអគ្គនាយកដ្ឋានកៅស៊ូកម្ពុជា បានបង្ហាញឲ្យដឹងថា ក្នុងឆ្នាំ ២០១៦ កម្ពុជា បាននាំចេញកៅស៊ូប្រមាណ ១៤៥,២០០តោន ទៅកាន់ទីផ្សារក្រៅប្រទេស រកចំណូលបានប្រមាណ ១៨៧លានដុល្លារអាមេរិក៕