ក្រសួងសាធារណការ និងដឹកជញ្ជូន បានចេញសេចក្តីជូនដំណឹងឲ្យដឹងថា ចាប់ពីយប់នេះទៅ ក្រសួងនឹងចាប់ផ្តើមបើកការដ្ឋានជួសជុលកំណាត់ផ្លូវជាតិលេខ២ គឺពង្រីកចិញ្ចើមផ្លូវសងខាង ដោយម្ខាងពង្រីក ៣ម៉ែត្រ ចាប់ពីរង្វង់មូលតាខ្មៅ (គ.ម. ១១+៤១៣) ដល់ ព្រំប្រទល់ខេត្តកណ្តាល-ខេត្តតាកែវ (គ.ម. ៣១+០០០)។

ការសម្រេចពង្រីកនេះ គឺដោយសារកំណើននៃទោចក្រយានយន្ត ត្រីចក្រយានយន្ត និងយានយន្ត មានការកើនឡើង ហើយក្រសួងក៏សំនូមពរឲ្យបងប្អូនប្រជាពលរដ្ឋ ធ្វើដំណើរតាមផ្លូវក្រវ៉ាត់ក្រុងទី២ ពីផ្លូវ ៦០ម៉ែត្រ ទៅផ្លូវចំការដូង ឬផ្លូវវត្តព្រែកថ្លឹង ផ្លូវលេខ ២០ ផ្លូវលេខ ១២០ និងផ្លូវជាតិលេខ ៣។

គម្រោងផ្លូវជាតិលេខ ២ គ្រោងនឹងចំណាយថវិកាប្រមាណ ៥៦លានដុល្លារអាមេរិក ក្រោមកម្ចីឥណទានពី រដ្ឋាភិបាលកូរ៉េ និងថវិការបដិភាគរបស់រាជរដ្ឋាភិបាលកម្ពុជាប្រមាណ ៨.៥លានដុល្លារអាមេរិក មានប្រវែង ៦៦គីឡូម៉ែត្រ។ នេះបើយោងតាម លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន។

ក្នុងនោះ ចាប់ពីរង្វង់មូលតាខ្មៅ រហូតដល់រង្វង់មូលអូរចំបក់មានប្រវែង ៥៧គីឡូម៉ែត្រ និង ៩គីឡូម៉ែត្រ នៅលើផ្លូវជាតិលេខ ២២ គ្រោងក្រាលកៅស៊ូ AC សង់ស្ពានថ្មី និងពង្រីកទទឹងផ្លូវឲ្យបាន ១៣ម៉ែត្រ តាមទំហំចរាចរណ៍ និងតាមដំណាក់កាល។

រីឯ ចាប់ពីរង្វង់មូលគួរស្រូវ ទៅទិសខាងត្បូងប្រវែង ៨គីឡូម៉ែត្រ គ្រោងនឹងសាងសង់ជា ៤គន្លង។

បច្ចុប្បន្នដៃគូអភិវឌ្ឍន៍កូរ៉េ កំពុងជ្រើសរើសទីប្រឹក្សាបច្ចេកទេ ដើម្បីចាប់ផ្តើមរៀបចំ Design និងជ្រើសរើសក្រុមហ៊ុនសាងសង់ ដោយដំណើរការនេះ អាចចំណាយពេល ១ឆ្នាំ ទម្រាំបានអនុវត្តការសាងសង់ជាក់ស្តែង។

យ៉ាងណាមិញ លោក ស៊ុន ចាន់ថុល នឹងស្នើសុំគោលការណ៍ស្វែងរកកញ្ចប់ថវិកាពិសេស ដើម្បីជួសជុលបណ្តោះអាសន្នឲ្យបានទាន់ពេលវេលា មិនរង់ចាំរហូតដល់ ១ឆ្នាំនោះឡើយ។

គួរជម្រាបដែរថា គម្រោងនេះ នឹងត្រូវចាប់ផ្តើមឲ្យបានលឿន ទាំងយប់ និងថ្ងៃ ដើម្បីកាត់បន្ថយការកកស្ទះ នឹងសម្រួលដល់ចរាចរណ៍ជូនដល់ បងប្អូនប្រជាពលរដ្ឋ៕