ព័ត៌មានសេដ្ឋកិច្ច

មន្ទីរពិសោធន៍ចល័ត ផ្នែកប្រេងឥន្ធនៈ តម្លៃ ១.៥សែនដុល្លារ ដាក់ដំណើរការជាផ្លូវការ

មន្ទីរពិសោធន៍ចល័តផ្នែកប្រេងឥន្ធន: តម្លៃជាង ១.៥សែនដុល្លារ ត្រូវបានដាក់ឲ្យដំណើរការជាផ្លូវការ កាលពីម្សិលមិញនេះ នៅក្រសួងពាណិជ្ជកម្ម។

លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម បានឲ្យដឹងថា រថយន្តមន្ទីរពិសោធន៍ម៉ូដែល​ FORD ឆ្នាំ ២០១៦ មានតម្លៃជាង ១.៥សែនដុល្លារអាមេរិក គឺជារថយន្តទី ២ បន្ទាប់ពី រថយន្តមន្ទីរពិសោធន៍ចល័តរបស់អគ្គនាយកដ្ឋានកាំកុងត្រូល តម្លៃជាង ១សែនដុល្លារអាមេរិក ត្រូវបានដាក់សម្ពោធឲ្យប្រើប្រាស់ ជាផ្លូវការ នៅចុងឆ្នាំ ២០១៦។

រថយន្តថ្មីនេះ​ នឹងជួយពង្រឹងប្រសិទ្ធភាពការងាររបស់មន្រ្តីកាំកុងត្រូល ក្នុងការចុះត្រួតពិនិត្យប្រេងឥន្ធន: នៅតាមស្ថានីយ៍ ឬដេប៉ូចែកចាយ នៅក្នុងរាជធានីភ្នំពេញ និងតំបន់ឆ្ងាយៗទូទាំងប្រទេស។

មន្ទីរពិសោធន៍ចល័តថ្មីនេះ បំពាក់ទៅដោយឧបករណ៍ទំនើប ដែលអាចវិភាគរកនូវ ប៉ារ៉ាម៉ែត្រនៃ ផលិតផលទំនិញជា ប្រេងឥន្ធន:ទាំងផ្នែកគុណភាព និងបរិមាណ។

គួរបញ្ជាក់ថា ក្រោយដាក់ឲ្យដំណើរការមន្ទីរពិសោធន៍ចល័តនេះ មន្រ្តីនៃអគ្គនាយកដ្ឋានកាំកុងត្រូល នឹងចុះត្រួតពិនិត្យគុណភាពប្រេងឥន្ធន:គ្រប់ប្រភេទដូចជា ប្រេងម៉ាស៊ូត ប្រេងសាំង និងប្រេងម៉ាស៊ីន នៅតាមស្ថានីយ៍ និងដេប៉ូចែកចាយទូទាំងប្រទេស៕

មតិយោបល់