នាឱកាសបុណ្យភ្ជុំបិណ្ឌរយៈពេល ៣ថ្ងៃកន្លងទៅ មានភ្ញៀវទេសចរជាតិ និងអន្តរជាតិ បានដើរកម្សាន្ត នៅតាមរមណីយដ្ឋាននានា ប្រមាណជាង ១លាននាក់ ដែលមានកំណើន ១៥ភាគរយ ធៀបនឹងឆ្នាំ ២០១៦។ នេះបើតាមការឲ្យដឹងពី ក្រសួងទេសចរណ៍។

ក្នុងនោះដែរ ភ្ញៀវទេសចរជាតិមានប្រមាណ ១លាន១ម៉ឺននាក់ កើនឡើងប្រមាណ ១៥ភាគរយ និងភ្ញៀវទេសចរអន្តរជាតិមានប្រមាណ ៤ម៉ឺននាក់ កើនឡើងប្រមាណ ៦ភាគរយ។

ខេត្តសៀមរាប ឈរលំដាប់លេខ ១ ទទួលបានភ្ញៀវទេសចរច្រើនជាងគេបំផុត ខណៈខេត្តក្រុងដទៃទៀត មានកំណើនភ្ញៀវទេសចរកើនឡើងដូចគ្នា គួរឲ្យកត់សម្គាល់។

តួយ៉ាង ខេត្តសៀមរាប ទទួលបានភ្ញៀវទេសចរជាង ១សែន៤ម៉ឺននាក់ ខេត្តព្រះសីហនុ ៩ម៉ឺននាក់ ខេត្តបាត់ដំបង ជិត ៨ម៉ឺននាក់ ខេត្តបន្ទាយមានជ័យ ៧ម៉ឺន៧ពាន់នាក់ និងខេត្តកំពត ៧ម៉ឺន៤ពាន់នាក់។

គួរជម្រាបដែរថា ការរៀបចំរមណីយដ្ឋាន និងគោលដៅទេសចរណ៍ មានការរីកចម្រើនកាន់តែប្រសើរផងដែរ ដូចជា ផ្លូវចូលទៅរមណីយដ្ឋានត្រូវបានជួសជុល អាចទប់ស្កាត់ការតម្លើងថ្លៃហួសហេតុលើម្ហូបអាហារនិងសេវាកម្ម បញ្ហាបរិស្ថានអនាម័យល្អប្រសើរជាងមុន និងបញ្ហាសន្តិសុខសុវត្ថិភាពមានភាពល្អប្រសើរឡើង៕