បុណ្យសមុទ្រលើកទី ៦ ជុំទី២ នឹងប្រារព្ធធ្វើឡើងនៅខេត្តកែប នាថ្ងៃទី ២២-២៣-២៤ ខែធ្នូ ចុងឆ្នាំ ២០១៧ខាងមុខនេះ ក្រោមប្រធានបទ «ឆ្នេរសមុទ្របៃតង៖ អនាគត គឺបច្ចុប្បន្ន» នឹងបើកជាផ្លូវការក្រោមអធិបតីភាពរបស់ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

លោក ថោង ខុន រដ្ឋមន្រ្តីក្រសួងទេសចរណ៍ក៏បានបង្ហាញពី ចំនុចសំខាន់ៗដែលត្រូវធ្វើសម្រាប់បុណ្យសមុទ្រ រួមមាន ការរៀបចំហេដ្ឋារចនាសម្ព័ន្ធ រៀបចំការតាំងពិព័រណ៍ រៀបចំទីក្រុងស្អាត រៀបចំឆ្នេរកម្សាន្ត ត្រួតពិនិត្យសេវាកម្មទេសចរ ត្រួតពិនិត្យម្ហូបអាហារ និងត្រួតពិនិត្យលើបញ្ហាបង្គន់អនាម័យ។

លោក ក៏បានស្នើថា កម្ពុជា ត្រូវយកឱកាសពិធីបុណ្យសមុទ្រលើកនេះ ធ្វើឲ្យខេត្តកែប ជាខេត្តគំរូខាងអនាម័យ និងគុណភាពសេវាកម្មទេសចរណ៍គឺ នៅតាមអាហារដ្ឋាន និងភោជនីយដ្ឋានមិនមានការបោះក្រដាសក្រោមតុ បន្ទប់ទឹកនិងបង្គន់អនាម័យសាធារណៈត្រូវស្អាត និងធ្វើឲ្យទីក្រុងកែប ជាទីក្រុងទេសចរណ៍ស្អាត គំរូ គ្មានសំរាម។

បុណ្យសមុទ្រលើកទី ៦នេះ ត្រូវបានរំពឹងថា នឹងទាក់ទាញភ្ញៀវជាតិ និងអន្តរជាតិ ឲ្យមកទស្សនាខេត្តកែបបានកាន់តែច្រើន ដែលនឹងរួមចំណែកជួយដល់សេដ្ឋកិច្ចជាតិផងដែរ។

នាឱកាសនេះ ក្រសួងពាណិជ្ជកម្ម នឹងរៀបចំពិព័រណ៍ពាណិជ្ជកម្មផលិតផលខ្មែរ «យុទ្ធនាការទិញផលិតផលខ្មែរ» ក្នុងឱកាសបុណ្យសមុទ្រឆ្នាំ ២០១៧ នេះផងដែរ ក្នុងគោលបំណងជួយជម្រុញ និងលើកកម្ពស់ផលិតផលក្នុងស្រុកឲ្យមានការទទួលស្គាល់ និងចូលរួមប្រើប្រាស់កាន់តែទូលំទូលាយ នៅទូទាំងប្រទេស។

គួរបញ្ជាក់ថា តំបន់ឆ្នេរសមុទ្រកម្ពុជា នឹងក្លាយជាគោលដៅទាក់ទាញទេសចរណ៍ លំដាប់ទី ២ បន្ទាប់ពីប្រាសាទអង្គរវត្ត ដែលរំពឹងនឹងទទួល ភ្ញៀវទេសចរណ៍អន្តរជាតិ បាន ២លាននាក់ នៅឆ្នាំ ២០២០៕