កាលពីពេលថ្មីៗនេះ ឯកឧត្តម ថោង ខុន រដ្ឋមន្ត្រីទេសចរណ៍កម្ពុជា និង ឯកឧត្តម U Onh Maung រដ្ឋមន្ត្រីក្រសួងសណ្ឋាគារ និងទេសចរណ៍មីយ៉ាន់ម៉ា បានពិភាក្សាជម្រុញការអនុវត្តអនុស្សរណ:យោគយល់គ្នាស្ដីពី កិច្ចសហប្រតិបត្តិការទេសចរណ៍ឆ្នាំ២០១៧-២០២០ ដោយផ្តោតការពិភាក្សាស៊ីជម្រៅលើចំណុចសំខាន់ៗ ៤ រួមមាន៖ ការជម្រុញការតភ្ជាប់ (ការហោះហើរត្រង់) រវាងខេត្តសៀមរាប និងបាកាន ការផ្សព្វផ្សាយរួមគ្នា ការសម្រួលការធ្វើដំណើរ និងការបណ្តុះបណ្តាលធនធានមនុស្ស។
ក្រោយកិច្ចពិភាក្សា ភាគីកម្ពុជា និងមីយ៉ាន់ម៉ា បានឯកភាពគ្នាជម្រុញការបង្កើនជើងហោះហើរ ពីទីក្រុងឌូបៃ នៃសហភាពអារ៉ាប់រួមអេម៊ីរ៉ាត យ៉ាំងហ្គូន ភ្នំពេញ តាមរយ:ក្រុមហ៊ុន Fly Emirates និងការជម្រុញការតភ្ជាប់ជើងហោះហើរ ពីទីក្រុងយ៉ាំងហ្គូន សៀមរាប អង្គរ រវាងក្រុមហ៊ុនអាកាសចរណ៍មីយ៉ាន់ម៉ា និងអាកាសចរណ៍កម្ពុជា Cambodia Angkor Air ដែលក្រុមហ៊ុនទាំងពីរនឹងបន្តពិភាក្សាការងារបច្ចេកទេសដើម្បីជម្រុញការហោះហើរត្រង់ឲ្យបានឆាប់។
លើសពីនេះក៏មាន ជម្រុញការផ្សព្វផ្សាយរួមគ្នា ដើម្បីបន្តរក្សាសមិទ្ធិផលដែលភាគីទាំងពីរបានធ្វើរួមគ្នាដូចជាការបោះពុម្ភបណ្ណផ្សព្វផ្សាយគោលដៅទេសចរណ៍សៀមរាប អង្គរ និងបាហ្គាន (ប្រទេសពីរ គោលដៅតែមួយ) ការផ្លាស់ប្តូរទស្សនកិច្ច Farm Trip សម្រាប់ប្រពន្ធផ្សព្វផ្សាយ និង ការសម្តែងវប្បធម៌រួមគ្នា។
លោក ទិត ចន្ថា រដ្ឋលេខាធិការក្រសួងទេសចរណ៍ បានបញ្ជាក់ក្រោយបញ្ចប់កិច្ចចុះអនុស្សរណ:ថា អនុស្សរណ:រវាងក្រសួងទេសចរណ៍កម្ពុជា និងក្រសួងសណ្ឋាគារ និងទេសចរណ៍មីយ៉ាន់ម៉ា នាពេលនេះ ធ្វើឡើងផ្ដោតសំខាន់លើ ផែនការកម្មវិធីអភិវឌ្ឍន៍វិស័យទេសចរណ៍រវាងកម្ពុជា និងមីយ៉ាន់ម៉ា ដើម្បីពង្រឹងកិច្ចសហប្រតិបត្តិការ ក៏ដូចជាជម្រុញឲ្យមានការអនុវត្ត និងការសហប្រតិបត្តិការគ្នារវាងប្រទេសទាំងពីរ ក្នុងការជម្រុញលំហូរទេសចរពីកម្ពុជាទៅមីយ៉ាន់ម៉ា ពីមីយ៉ាន់ម៉ាមកកម្ពុជា និងទេសចរប្រទេសទី៣ផងដែរ។
លោក ទិត ចន្ថា បានបន្តថា ក្រៅពីនេះ អនុស្សរណ:ខាងលើក៏បានផ្ដោតសំខាន់ទៅលើកិច្ចសហប្រតិបត្តិការទេសចរណ៍ «អង្គរ-បាហ្គាន រាជធានីបុរាណពីរ គោលដៅទេសចរណ៍តែមួយ» ដោយមានការរំលេចពីសក្ដានុពលពីបុរាណដ្ឋានទាំងពីរ គឺអង្គរវត្តរបស់កម្ពុជា និងបាហ្គានរបស់មីយ៉ាន់ម៉ា ដែលមានសក្ដានុពលដ៏ធំក្នុងវិស័យទេសចរណ៍វប្បធម៌ ដើម្បីទាក់ទាញភ្ញៀវទេសចរទៅមកទស្សនាតំបន់បេតិកភណ្ឌវប្បធម៌នៃប្រទេសទាំងពីរនេះ ឲ្យកាន់តែច្រើនឡើងថែមទៀត សំដៅទាក់យកផលចំណេញផ្នែកសេដ្ឋកិច្ចសម្រាប់ប្រទេសទាំងពីរ។
សូមជម្រាបថា រាជធានីបាហ្គាន (ខ្មែរបុរាញហៅថា ហង្សាវត្តី) គឺជាទីក្រុងបុរាណស្ថិតនៅកណ្ដាលប្រទេសមីយ៉ាន់ម៉ា ដែលធ្លាប់ជាទីក្រុងដ៏មានឥទ្ធិពលរុងរឿងបំផុតក្នុងប្រវត្តិសាស្ត្រភូមា កាលពីជិត១ពាន់ឆ្នាំមុន។ ទីក្រុងនេះមានប្រាសាទ និងចេតិយព្រះពុទ្ធសាសនាប្រមាណ ១ម៉ឺនកន្លែង ត្រូវបានកសាងចន្លោះសតវត្សទី១១ និងទី១៣ ប៉ុន្តែបច្ចុប្បន្ននៅសល់តែប្រាសាទ និងវត្តអារាមជាង ២ពាន់កន្លែងប៉ុណ្ណោះ៕
មតិយោបល់